گورنر خیبر پختونخوا کا صوبے کے عوام کے نام اہم پیغام

پشاور: گورنر خیبرپختونخوا فیصل کریم کنڈی نے کہا ہے کہ صوبے کے عوام امن، استحکام، ترقی اور خوشحالی چاہتے ہیں اور وہ دہشت گردی و پُرتشدد کارروائیوں کی حمایت نہیں کرتے۔

اپنے ویڈیو پیغام میں فیصل کریم کنڈی نے کہا کہ خیبرپختونخوا کے عوام صدارتی پروکلیمیشن کا خیرمقدم کرتے ہیں اور انہوں نے فیصلہ کرلیا ہے کہ وہ مزید فتنہ الخوارج کا ساتھ نہیں دیں گے۔ ان کے مطابق عوام سکیورٹی اداروں کے شانہ بشانہ کھڑے ہوکر دہشت گردی کے خلاف لڑیں گے۔

گورنر نے کہا کہ صوبے کے عوام انتشار اور بدامنی کے بجائے پُرامن اور خوشحال مستقبل کے خواہاں ہیں۔ وہ دیگر صوبوں کے ساتھ برادرانہ تعلقات اور باہمی تعاون کے ذریعے ترقی و خوشحالی کو فروغ دینا چاہتے ہیں۔

فیصل کریم کنڈی کا کہنا تھا کہ عوام جمہوری اقدار کے فروغ اور ترقی کے ثمرات عام شہری تک پہنچتے دیکھنا چاہتے ہیں۔ انہوں نے شہریوں پر زور دیا کہ وہ قانون شکنی، اشتعال انگیزی اور دنگا فساد سے اجتناب کریں۔

گورنر خیبرپختونخوا نے خبردار کیا کہ امن و امان خراب کرنے یا قانون ہاتھ میں لینے والوں کے خلاف قانون کے مطابق سخت کارروائی کی جائے گی۔