​نیشنل پریس کلب میرپورخاص کا اہم اجلاس، صحافیوں کا پیشہ ورانہ ذمہ داریاں احسن طریقے سے نبھانے کا عزم

میرپورخاص(عباس آرائیں)
​کلب کے تمام اراکین کو نظم و ضبط قائم رکھنے پر شاندار خراج تحسین؛ صحافت معاشرے کی بیدار آنکھ اور زبان ہے، حیات قریشی
​تفصیلات کے مطابق نیشنل پریس کلب میرپورخاص میں کلب کے سرپرست اعلیٰ آفاق احمد خان کی زیر صدارت ایک اہم اور جامع اجلاس منعقد ہوا جس کا آغاز تلاوت کلام پاک سے کیا گیا، اجلاس میں صدر حیات قریشی، سینئر نائب صدر سید لیاقت علی شاہ اور جنرل سیکریٹری اقبال سولنگی سمیت تمام عہدیداران اور اراکین نے بھرپور شرکت کی۔ اس موقع پر سرپرست آفاق احمد خان نے شرکا سے گفتگو کرتے ہوئے کہا کہ موجودہ کٹھن حالات میں صحافت کے فرائض سر انجام دینا ایک انتہائی دشوار اور مشکل ترین کام ہے، انہوں نے نیشنل پریس کلب میرپورخاص سے وابستہ تمام صحافیوں کو مثالی ڈسپلن اور نظم و ضبط کے دائرے میں رہ کر کام کرنے پر خراج تحسین پیش کیا اور امید ظاہر کی کہ وہ مستقبل میں بھی اسی پیشہ ورانہ لگن اور وقار کے ساتھ اپنا فعال کردار ادا کرتے رہیں گے۔ اس موقع پر صدر حیات قریشی نے اجلاس سے خطاب کرتے ہوئے تمام صحافیوں پر زور دیا کہ وہ اپنا صحافتی کردار ادا کرنے میں مزید نکھار پیدا کریں کیونکہ کسی بھی زندہ اور بیدار معاشرے کی آنکھ اور زبان صحافی ہی ہوتا ہے۔ اجلاس کے دوران تمام شرکا نے اپنی پیشہ ورانہ ذمہ داریوں کی انجام دہی کے حوالے سے مفید اور بہترین تجاویز بھی پیش کیں، اس پروقار اجلاس میں صدر حیات قریشی، سینئر نائب صدر سید لیاقت علی شاہ، جنرل سیکریٹری اقبال سولنگی، جوائنٹ سیکریٹری مبین چانہیوں، شہریار بلند، وسیم خانزادہ، جاوید اقبال، اسلم مہر، محمد اجمل، رامچند، اقبال میمن، امام الدین شاہ اور اویس احمد شیخ سمیت دیگر نامور صحافی بھی موجود تھے۔