اسلام آباد پر چڑھائی قابل قبول نہیں، دہشت گردی پرخاموشی ملک دشمنی کے مترادف ہے، وزیر اعظم

وزیراعظم شہباز شریف نے کہا ہے کہ اسلام آباد پر چڑھائی کسی صورت قابل قبول نہیں، دہشت گردی پر خاموشی ملک دشمنی کے مترادف ہے، پانی سر سے گزر چکا ہے اور اب فیصلے کا وقت ہے۔

وفاقی کابینہ کے اجلاس سے خطاب کرتے ہوئے وزیراعظم نے کہا کہ لانگ مارچ کے ذریعے اسلام آباد پر چڑھائی کرکے ماضی کی تلخ یادیں تازہ کرنے کی کوشش کی جارہی ہے۔ ملک کو دوبارہ تباہی کی طرف نہیں جانے دیا جائے گا اور قانون اپنا راستہ اختیار کرے گا۔

انہوں نے کہا کہ خیبرپختونخوا میں دہشت گرد فورسز کے اہلکاروں اور شہریوں کو نشانہ بنا رہے ہیں، جبکہ افواج پاکستان دہشت گردوں کے خلاف کارروائیاں کررہی ہیں۔ وزیراعظم کے مطابق صوبائی حکومت دہشت گردی کے خلاف مؤثر آواز اٹھانے میں خاموش ہے۔ انہوں نے بتایا کہ گزشتہ دس سال کے دوران خیبرپختونخوا میں دہشت گردی کے خلاف اقدامات کے لیے 800 ارب روپے فراہم کیے گئے۔

شہباز شریف نے کہا کہ مولانا فضل الرحمٰن نے مذاکرات میں خلوص کے ساتھ اپنا کردار ادا کرنے کی کوشش کی ہے۔ ملک کو بار بار عدم استحکام اور تباہی کی طرف دھکیلنے کی اجازت نہیں دی جائے گی۔

وزیراعظم نے سعودی عرب کے ساتھ پاکستان کی دوستی اور دفاعی معاہدے کا ذکر کرتے ہوئے کہا کہ پاکستان سعودی عرب کے ساتھ مکمل یکجہتی کا اظہار کرتا ہے۔ انہوں نے خطے میں امن کی ضرورت پر زور دیتے ہوئے باب المندب کی صورتحال اور حوثیوں کی کارروائیوں کو قابل مذمت قرار دیا۔ ان کا کہنا تھا کہ پاکستان کی خواہش ہے کہ معاملات امن اور خوش اسلوبی سے حل ہوں۔

انہوں نے کہا کہ پاکستان اور آئی ایم ایف کے درمیان اسٹاف لیول معاہدہ ہوچکا ہے اور رواں سال 1.2 ارب ڈالر کی قسط موصول ہونے کی توقع ہے۔ وزیراعظم کے مطابق آئی ایم ایف کی منیجنگ ڈائریکٹر نے پاکستان کی معاشی اصلاحات کو سراہا ہے۔

شہباز شریف نے مزید کہا کہ عالمی رہنماؤں نے ایران اور امریکا کے درمیان جنگ بندی کے لیے پاکستان کی کوششوں کو سراہا ہے۔ پاکستان خطے میں امن کے قیام کے لیے ثالثی کا کردار خلوص کے ساتھ جاری رکھے گا، جبکہ فیلڈ مارشل سید عاصم منیر نے بھی ان کوششوں میں اہم کردار ادا کیا ہے۔