نوجوان بیٹی کے اندوہناک قتل کا معاملہ، سوگوار ماں کا قرآن پاک اٹھا کر انصاف کا مطالبہ

نوجوان بیٹی کے اندوہناک قتل کا معاملہ، سوگوار ماں کا قرآن پاک اٹھا کر انصاف کا مطالبہ
مقتولہ ناہید اختر کو اس کے شوہر سیف خان نے پسٹل کے فائر سے قتل کیا، ایف آئی آر درج
متاثرہ خاندان کا بدعنوان تفتیشی افسر سب انسپکٹر محمد اقبال سیال پر ملزم کو بچانے اور رشوت لینے کا سنگین الزام، فوری تبدیلی کا مطالبہ

جھنگ (نمائندہ خصوصی)ضلع جھنگ کے علاقے تھانہ قادر پور کی حدود منڈی شاہ جیونہ (سکندر آباد مہار والی) میں پیش آنے والے نوجوان بیٹی کے دل دہلا دینے والے قتل کے معاملے میں تفتیشی افسر سب انسپکٹر محمد اقبال سیال کا کردار انتہائی مشکوک اور تاریک سامنے آیا ہے، جو مبینہ طور پر رشوت لے کر مرکزی قاتل کو بچانے کی مکروہ کوششوں میں مصروف ہیں۔ منڈی شاہ جیونہ سکندر آباد کی رہائشی بوڑھی خاتون کوثر پروین نے اپنے شوہر محمد نواز بلوچ اور بیٹے فراز کے ہمراہ میڈیا کو انٹرویو دیتے ہوئے قرآن پاک پر حلفیہ انکشاف کیا ہے کہ اس کی بیٹی ناہید اختر کو اس کے اپنے شوہر (داماد) سیف خان بلوچ نے پسٹل سے فائرنگ کر کے بے دردی سے قتل کیا، جس کی گولی مقتولہ کے پیٹ میں لگی اور جسم کو چیرتی ہوئی پار ہو گئی۔ اس سفاکانہ قتل کا مقدمہ تھانہ قادر پور میں ایف آئی آر نمبر 580/26 کے تحت درج کر لیا گیا ہے، جہاں اگرچہ ایس ایچ او تھانہ قادر پور شاہد امیر لدھیانہ تعاون کر رہے ہیں، لیکن اس مقدمے کے اصل تفتیشی افسر (IO) سب انسپکٹر محمد اقبال سیال نے قانون اور اپنے منصب کی دھجیاں بکھیر دی ہیں۔ متاثرہ خاندان کا کہنا ہے کہ سب انسپکٹر محمد اقبال سیال غیر جانبدارانہ تحقیقات کرنے کے بالکل برعکس، قاتل ملزم سیف خان کو تحفظ فراہم کرنے اور بھاری رشوت کے عوض مک مکا کرنے میں دن رات مصروف ہے، جس کی وجہ سے انصاف کا خون ہو رہا ہے۔ سوگوار ورثاء نے اعلیٰ حکام بالخصوص ڈی پی او جھنگ سے پرزور مطالبہ کیا ہے کہ اس بدعنوان اور رشوت خور تفتیشی افسر سب انسپکٹر محمد اقبال سیال کو فوری طور پر تھانہ قادر پور سے ہٹایا جائے تاکہ اس اندوہناک قتل کی شفاف تحقیقات ہو سکیں اور مظلوم خاندان کو انصاف فراہم کیا جا سکے۔