موسم کی تبدیلی سے بچوں میں نزلہ، زکام اور سانس کی بیماریوں کا خطرہ بڑھ جاتا ہے، ڈاکٹر شکیل احمد جوئیہ

منڈی مدرسہ(عبدالقادر فاروقی) موسم کی تبدیلی کے باعث بچوں میں نزلہ، زکام، کھانسی اور سانس کی بیماریوں کےامکان بڑھ جاتے ہیں: ڈاکٹر شکیل احمد جوئیہ سردیوں کے آغاز اور موسم کی تبدیلی کے باعث بچوں میں نزلہ، زکام، کھانسی، بخار اور سانس کی بیماریوں کے امکانات بڑھ جاتے ہیں، والدین بچوں کی صحت کے حوالے سے خصوصی احتیاط کریں۔ان خیالات کا اظہار ڈاکٹر شکیل احمد جوئیہ نے میڈیا سے گفتگو کرتے ہوئے کیا ۔انہوں نے کہا کہ والدین بچوں کو موسم کے مطابق گرم لباس پہنائیں، خاص طور پر صبح اور شام کے اوقات میں سردی سے بچائیں، ہاتھ بار بار دھونے کی عادت اپنائیں، گھر میں ہوا اور دھوئیں کی آلودگی سے بچوں کو محفوظ رکھیں اور بیمار افراد سے غیر ضروری میل جول سے گریز کریں۔ بچوں کو متوازن اور غذائیت سے بھرپور خوراک، مناسب مقدار میں پانی اور پوری نیند دی جائے۔ سردی سے بچاؤ کے لیے بچوں کو ضرورت سے زیادہ گرم کپڑوں میں لپیٹنے کے بجائے موسم کے مطابق لباس پہنایا جائے۔ والدین کو ہدایت کی کہ بچے کو تیز یا مسلسل بخار، سانس لینے میں دشواری، سینے میں جکڑن، مسلسل کھانسی یا غیر معمولی سستی کی صورت میں خود سے اینٹی بایوٹک یا دوسری ادویات دینے کے بجائے فوری طور پر ماہر اطفال سے رجوع کریں۔