اس بار فیصلہ کن معرکہ ہوگا اورپی ٹی آئی پھر کبھی اسلام آباد کا رخ نہیں کرے گی، خواجہ آصف

اسلام آباد، 25 ستمبر: وزیر دفاع خواجہ آصف نے کہا ہے کہ پاکستان تحریک انصاف کی جانب سے اسلام آباد کا رخ کرنے کی کوشش اس بار فیصلہ کن مرحلے کا باعث بن سکتی ہے اور اس کے بعد پی ٹی آئی دوبارہ اس طرح وفاقی دارالحکومت کا رخ نہیں کر سکے گی۔

نیویارک میں اقوام متحدہ کی جنرل اسمبلی کے اجلاس کیلئے وزیراعظم شہباز شریف کے وفد میں شامل خواجہ آصف نے ایک انٹرویو میں کہا کہ پی ٹی آئی والے اسلام آباد کو سومنات کے مندر سے تشبیہ دے رہے ہیں۔ ان کا کہنا تھا کہ اسلام آباد ایک بڑی اسلامی اور ایٹمی ریاست کا دارالحکومت ہے اور اگر پی ٹی آئی نے مارچ کیا تو یہ ان کی آخری کوشش ہوگی۔

وزیر دفاع نے کہا کہ اس بار فیصلہ کن معرکہ ہوگا اور اس کے بعد پی ٹی آئی کے لوگ اس طرح اسلام آباد کا رخ نہیں کر سکیں گے۔ انہوں نے یہ بھی کہا کہ ممکن ہے پی ٹی آئی کے کارکن اسلام آباد آئیں ہی نہ، اور یہ بھی ایک فیصلہ کن بات ہوگی۔

خواجہ آصف کے مطابق وفاقی حکومت اور پاکستان مزید اس نوعیت کی صورتحال کے متحمل نہیں ہوسکتے۔ ان کا یہ بیان پی ٹی آئی کی جانب سے 27 ستمبر کو اسلام آباد مارچ کے اعلان کے تناظر میں سامنے آیا ہے۔