سیٹلائٹ ٹاؤن میں گیس پریشر کی کمی اور غیر اعلانیہ لوڈشیڈنگ سے شہری پریشان

کوئٹہ ()جمعیت علماء اسلام حلقہ 35 سیٹلائٹ ٹاؤن یونٹ کے امیر مفتی محمد احمد، سیکرٹری جنرل مولوی سعید الرحمان، نائب امیر مولوی عبدالمطلب، ڈپٹی سیکرٹری جنرل حاجی نعمت خلجی، سیکرٹری اطلاعات مولوی عمیر، سیکرٹری مالیات ایڈووکیٹ شعیب خان اور دیگر نے کہا ہے کہ سیٹلائٹ ٹاؤن اور اس سے ملحقہ علاقوں میں گیس پریشر میں شدید کمی اور غیر اعلانیہ لوڈشیڈنگ نے عوام کی زندگی اجیرن بنا دی ہے۔ موسمِ سرما کی شدت میں اضافے کے باوجود گیس کی مسلسل عدم فراہمی اور کم پریشر کے باعث شہری شدید مشکلات سے دوچار ہیں خصوصاً صبح سویرے اور دن کے مختلف اوقات میں گیس کی بندش اور کم پریشر نے گھریلو معمولات بری طرح متاثر کر دیے ہیں۔ انہوں نے کہا کہ گیس کی عدم فراہمی کے باعث خواتین بچوں بزرگوں اور دیگر شہریوں کو شدید مشکلات کا سامنا ہے گیس کی سہولت میسر نہ ہونے کے باوجود صارفین کو بھاری بھرکم بلوں کی ادائیگی پر مجبور کیا جارہا ہے جو عوام کے ساتھ سراسر ناانصافی ہے۔ انہوں نے گیس حکام سے مطالبہ کیا کہ سیٹلائٹ ٹاؤن اور ملحقہ علاقوں میں گیس پریشر کی فوری بحالی غیر اعلانیہ لوڈشیڈنگ کے خاتمے اور موسمِ سرما کے دوران گیس کی بلاتعطل فراہمی کو یقینی بنایا جائے۔