2025 کا پاک بھارت تنازع یاد دہانی ہے کہ مسئلہ کشمیر کو غیرحل شدہ چھوڑنا خطرناک ہے، اسحاق ڈار

نیویارک: نائب وزیراعظم اور وزیر خارجہ اسحاق ڈار نے کہا ہے کہ مئی 2025 کا پاک بھارت تنازع اس بات کی یاد دہانی ہے کہ مسئلہ کشمیر کو غیرحل شدہ چھوڑنا خطرناک نتائج کا باعث بن سکتا ہے۔

نیویارک میں او آئی سی رابطہ گروپ برائے جموں و کشمیر کے اجلاس سے خطاب کرتے ہوئے اسحاق ڈار نے کہا کہ کشمیری عوام تقریباً آٹھ دہائیوں سے اقوام متحدہ کے فریم ورک کے تحت حق خودارادیت کے منتظر ہیں۔

انہوں نے مقبوضہ جموں و کشمیر کی صورتحال پر تشویش کا اظہار کرتے ہوئے کہا کہ پاکستان کے مطابق 5 اگست 2019 کے بعد بھارت کی جانب سے ایسے اقدامات کیے گئے جن سے خطے کی آبادیاتی، سیاسی اور ثقافتی حیثیت متاثر ہوئی۔ انہوں نے کشمیری رہنماؤں اور نوجوانوں کے خلاف سخت قوانین کے استعمال اور صحافیوں کی آواز محدود کیے جانے کا بھی دعویٰ کیا۔

اسحاق ڈار نے کہا کہ پاکستان مسئلہ کشمیر کے منصفانہ اور پرامن حل کے لیے متعلقہ اقوام متحدہ کی سلامتی کونسل کی قراردادوں اور کشمیری عوام کی خواہشات کے مطابق پیش رفت کا حامی ہے۔ انہوں نے او آئی سی رکن ممالک پر زور دیا کہ وہ اقوام متحدہ اور دیگر عالمی فورمز پر مسئلہ کشمیر کے حوالے سے مشترکہ مؤقف برقرار رکھیں۔