نوشکی میں پولیو ٹیم کی سکیورٹی پر حملہ، وزیر داخلہ کی شدید مذمت

کوئٹہ: وزیر داخلہ بلوچستان میر ضیاء اللہ لانگو نے نوشکی میں پولیو ٹیم کی سکیورٹی پر مامور پولیس اہلکاروں پر حملے کی شدید مذمت کرتے ہوئے واقعے کی رپورٹ طلب کرلی۔

وزیر داخلہ نے آئی جی پولیس بلوچستان اور ایڈیشنل سیکرٹری داخلہ سے نوشکی واقعے کی رپورٹ طلب کرتے ہوئے کہا کہ پولیو ٹیم کی حفاظت پر مامور پولیس اہلکاروں کی شہادت پر دلی دکھ اور افسوس ہے۔ حکومت شہید اہلکاروں کے اہلخانہ کے غم میں برابر کی شریک ہے۔

میر ضیاء اللہ لانگو نے کہا کہ پولیو ورکرز کی حفاظت پر مامور پولیس اہلکاروں کو نشانہ بنانا بلوچستان کے بچوں کے محفوظ مستقبل پر حملہ ہے۔ پولیو کے خلاف جنگ دراصل صوبے کے بچوں کو محفوظ اور صحت مند مستقبل دینے کی جنگ ہے۔

انہوں نے کہا کہ دہشت گرد عناصر بلوچستان کے بچوں کو بیماریوں سے محفوظ بنانے کی کوششوں کو نقصان نہیں پہنچا سکتے۔ پولیو ورکرز اور پولیس اہلکار اپنی جانوں کی پروا کیے بغیر بچوں کو معذوری سے بچانے کیلئے فرائض انجام دے رہے ہیں۔

وزیر داخلہ بلوچستان نے کہا کہ حکومت بچوں کو پولیو سمیت تمام موذی بیماریوں سے محفوظ رکھنے اور انہیں پرامن ماحول فراہم کرنے کیلئے پرعزم ہے۔