ایرانی حملوں میں متاثرہ خلیجی توانائی تنصیبات کی بحالی کے لیے امریکا نے 5 ارب ڈالر کی پیشکش کر دی

واشنگٹن: امریکا نے ایران کے ساتھ جاری جنگ کے دوران متاثر ہونے والی خلیجی توانائی تنصیبات کی بحالی اور آبنائے ہرمز کے متبادل برآمدی راستے تیار کرنے کیلئے 5 ارب ڈالر کے کثیر ملکی فنڈ کی تجویز دی ہے۔

وال اسٹریٹ جرنل کی رپورٹ کے مطابق امریکا نے مجوزہ فنڈ میں 5 ارب ڈالر فراہم کرنے کی پیشکش کی ہے، جبکہ سعودی عرب، متحدہ عرب امارات، قطر، بحرین، کویت، عمان، عراق اور اردن سے مزید 5 ارب ڈالر فراہم کرنے کی توقع ہے۔

رپورٹ کے مطابق مجوزہ منصوبے کا نام پارٹنرشپ فار الائیڈ ٹرسٹ اینڈ کنسٹرکشن رکھا گیا ہے، جبکہ امریکی ڈویلپمنٹ فنانس کارپوریشن فنڈ کے انتظامات سنبھالے گی۔

امریکی حکام کے مطابق منصوبے پر بات چیت ابھی جاری ہے اور اس کی شرائط میں تبدیلی ممکن ہے۔ فی الحال یہ بھی حتمی نہیں کہ کون کون سے ممالک اس منصوبے میں شامل ہوں گے۔

رپورٹ میں کہا گیا ہے کہ جنگ کے دوران ایرانی میزائلوں اور ڈرونز سے خلیجی خطے میں متعدد ریفائنریوں، آئل فیلڈز اور گیس برآمدی ٹرمینلز متاثر ہوئے۔ بعض خلیجی حکام نے خدشہ ظاہر کیا ہے کہ امن معاہدے سے قبل تعمیر نو کیلئے فنڈنگ شروع کرنا قبل از وقت ہوسکتا ہے کیونکہ نئی تنصیبات دوبارہ حملوں کا نشانہ بن سکتی ہیں۔