فیلڈ مارشل کی فارمیشنز کو ہمہ وقت چوکس رہنے اور اعلیٰ آپریشنل تیاری برقرار رکھنے کی ہدایت

پشاور: فیلڈ مارشل سید عاصم منیر نے پشاور کور ہیڈکوارٹرز کا دورہ کرتے ہوئے فارمیشنز کو ہمہ وقت چوکس رہنے اور اعلیٰ سطح کی آپریشنل تیاری برقرار رکھنے کی ہدایت کی ہے۔

آئی ایس پی آر کے مطابق دورے کے دوران آرمی چیف کو خیبرپختونخوا کی موجودہ سیکیورٹی صورتحال، جاری انسدادِ دہشت گردی کارروائیوں، سرحدی انتظامات اور فارمیشنز کی آپریشنل تیاریوں پر بریفنگ دی گئی۔

فیلڈ مارشل سید عاصم منیر نے افسران اور جوانوں کے بلند حوصلے، پیشہ ورانہ صلاحیت اور تیاری کو سراہتے ہوئے عوام کے تحفظ اور سلامتی کیلئے ان کی خدمات کو خراج تحسین پیش کیا۔

آرمی چیف نے کہا کہ مسلح افواج قوم کی حمایت کے ساتھ دہشت گردی کے خاتمے اور ملک میں پائیدار امن و استحکام کے قیام کیلئے پرعزم ہیں، جبکہ دہشت گردی کے خلاف جنگ میں شہداء کی قربانیوں کو کبھی فراموش نہیں کیا جائے گا۔

دورے کے موقع پر فیلڈ مارشل سید عاصم منیر نے یادگارِ شہداء پر حاضری دی، پھولوں کی چادر چڑھائی اور فاتحہ خوانی کی۔ انہوں نے ملکی دفاع اور دہشت گردی کے خلاف جنگ میں جانوں کا نذرانہ پیش کرنے والے شہداء کو خراج عقیدت پیش کیا۔