اسلام آباد پر دھاوا بولا تو اپنا ہی نقصان ہوگا، محسن نقوی کی پی ٹی آئی کو وارننگ

لاہور: وفاقی وزیر داخلہ محسن نقوی نے پی ٹی آئی کے مجوزہ اسلام آباد مارچ کے حوالے سے کہا ہے کہ اگر اسلام آباد کی طرف مارچ کیا گیا تو اس کے نتائج خود پی ٹی آئی کے لیے نقصان دہ ہوسکتے ہیں۔

لاہور میں پریس کانفرنس کرتے ہوئے محسن نقوی نے کہا کہ اسلام آباد ہائیکورٹ کا حکم موجود ہے اور اس پر عملدرآمد کرایا جائے گا۔ ان کے مطابق احتجاج سے ملکی معیشت کو نقصان پہنچ سکتا ہے، اس لیے سیاسی رہنماؤں کو معاملے پر نظرثانی کرنی چاہیے۔

وزیر داخلہ نے کہا کہ حکومت نے قانون نافذ کرنے والے اداروں کو صورتحال سے نمٹنے کے لیے واضح ہدایات دے دی ہیں۔ انہوں نے پی ٹی آئی رہنماؤں سے کہا کہ وہ ایسا راستہ اختیار نہ کریں جس سے واپسی مشکل ہوجائے۔

محسن نقوی کا کہنا تھا کہ حکومت احتجاج کے معاملے پر قانونی فیصلوں کے مطابق کارروائی کرے گی، جبکہ سیاسی اختلاف اپنی جگہ لیکن امن و امان برقرار رکھنا حکومت کی ذمہ داری ہے۔