قلات، سیکیورٹی فورسز نے دہشت گردوں کی چیک پوسٹ تباہ کر دی، 5 دہشت گرد ہلاک، 23 مغوی بازیاب

قلات کے قریب قومی شاہراہ این-25 پر سیکیورٹی فورسز نے دہشت گردوں کی جانب سے قائم چیک پوسٹ کے خلاف کارروائی کرتے ہوئے 5 دہشت گردوں کو ہلاک کردیا۔

آئی ایس پی آر کے مطابق دہشت گردوں نے این-25 پر عوامی آمدورفت میں خلل ڈالنے، اغوا، بھتہ خوری اور گاڑیاں چھیننے کے لیے چیک پوسٹ قائم کر رکھی تھی۔

سیکیورٹی فورسز نے بروقت کارروائی کرتے ہوئے دہشت گردوں کے ٹھکانے کو کلیئر کیا اور وہاں سے 23 مغوی افراد کو بحفاظت بازیاب کرالیا۔

کارروائی کے دوران دہشت گردوں کے قبضے سے 6 ٹرک، 3 بسیں اور 2 کاریں بھی برآمد کی گئیں، جبکہ بڑی تعداد میں اسلحہ، گولہ بارود اور دھماکا خیز مواد قبضے میں لے لیا گیا۔

آئی ایس پی آر کے مطابق علاقے میں دہشت گردوں کے خلاف کلیئرنس آپریشن جاری ہے۔