کوئٹہ میں اے جی آفس کے آڈٹ افسر فائرنگ سے جاں بحق، پولیس کی تحقیقات شروع

نامعلوم مسلح افراد کی فائرنگ سے اے جی آفس کوئٹہ کے آڈٹ افسر غیور بزدار جاں بحق ہوگئے۔

ذرائع کے مطابق فائرنگ کا واقعہ غیور بزدار کے گھر کے قریب پیش آیا، جہاں نامعلوم افراد نے انہیں نشانہ بنایا اور واردات کے بعد فرار ہوگئے۔ فائرنگ کے نتیجے میں غیور بزدار شدید زخمی ہوئے تاہم بعد ازاں جانبر نہ ہوسکے۔

واقعے کی اطلاع ملتے ہی پولیس موقع پر پہنچ گئی اور علاقے کو گھیرے میں لے کر شواہد اکٹھے کرنا شروع کردیئے۔

پولیس حکام کے مطابق واقعے کی مختلف پہلوؤں سے تحقیقات جاری ہیں جبکہ مزید شواہد اور معلومات جمع کی جا رہی ہیں۔ پولیس کا کہنا ہے کہ ملزمان کی گرفتاری کے لیے بھی کارروائی شروع کردی گئی ہے۔