بلوچستان میں سیکیورٹی فورسز کی کارروائیوں میں 3 دہشتگرد ہلاک، بھاری اسلحہ برآمد

آواران: سیکیورٹی ذرائع کے مطابق بلوچستان کے مختلف علاقوں میں آپریشن ردالفتنہ 3 کے تحت کارروائیاں جاری ہیں، آواران کے علاقے بدرنگ میں انٹیلی جنس بیسڈ آپریشن کے دوران 3 دہشتگرد ہلاک ہوگئے۔

ذرائع کا کہنا ہے کہ کارروائی کے دوران ہلاک ہونے والے افراد کا تعلق فتنہ الہندوستان سے تھا جبکہ ان کے قبضے سے بھاری مقدار میں اسلحہ اور گولہ بارود بھی برآمد کیا گیا۔

سیکیورٹی ذرائع کے مطابق بلوچستان میں دہشتگردی کے خلاف کارروائیاں جاری ہیں اور مختلف علاقوں میں سیکیورٹی اقدامات مزید مؤثر بنائے جا رہے ہیں۔

وفاقی وزیر داخلہ محسن نقوی نے آواران میں کارروائی کے دوران 3 دہشتگردوں کی ہلاکت پر سیکیورٹی فورسز کو خراج تحسین پیش کیا۔

انہوں نے کہا کہ بلوچستان میں قیام امن کے لیے سیکیورٹی فورسز کے اہلکار پرعزم ہیں اور دہشتگردوں کے عزائم ناکام بنانے پر انہیں سلام پیش کرتے ہیں۔

محسن نقوی کا کہنا تھا کہ دہشتگردوں اور ان کے سہولت کاروں کے مکمل خاتمے کے لیے پوری قوم سیکیورٹی فورسز کے ساتھ کھڑی ہے۔