جھل مگسی میں ریسٹ ہاؤس اور تھانے پر مسلح افراد کا حملہ

جھل مگسی نواب مگسی ریسٹ ہاؤس اور پولیس تھانہ کوٹڑہ پر مسلح افراد کا حملہ، شدید فائرنگ راکٹ لانچر اور دیگر بھاری ہتھیاروں کا استعمال، دونوں جانب سے فائرنگ کا تبادلہ، علاقے میں خوف و ہراس؛ سکیورٹی فورسز اور پولیس کی بھاری نفری موقع پر پہنچ گئی۔

ڈیرہ مراد جمالی (ہمارا بلوچستان نیوز) ضلع جھل مگسی کے علاقے نفور میں نامعلوم مسلح افراد نے سابق وزیراعلیٰ بلوچستان و سابق گورنر بلوچستان نواب ذوالفقار علی مگسی کے نجی ریسٹ ہاؤس اور پولیس تھانہ کوٹڑہ پر راکٹ لانچروں اور دیگر بھاری ہتھیاروں سے حملہ کر دیا، جس کے بعد علاقے میں شدید فائرنگ کا سلسلہ شروع ہوگیا۔

پولیس کے مطابق مسلح افراد نے نفور کے علاقے میں واقع نواب مگسی ریسٹ ہاؤس کو نشانہ بنایا، جہاں موجود سکیورٹی گارڈز نے حملہ آوروں کی فائرنگ کا جوابی فائرنگ سے جواب دیا۔ حملے کے دوران مبینہ طور پر راکٹ بھی داغے گئے، جبکہ شدید فائرنگ سے پورا علاقہ گونج اٹھا اور مقامی آبادی میں خوف و ہراس پھیل گیا۔

پولیس کے مطابق واقعے کی اطلاع ملنے پر وفاقی وزیر سائنس و ٹیکنالوجی نوابزادہ میر خالد حسین مگسی، میر جعفر خان مگسی اور مگسی قبیلے کے دیگر افراد موقع پر پہنچ گئے، جبکہ سکیورٹی فورسز اور پولیس کی بھاری نفری بھی جائے وقوعہ کی جانب روانہ کی گئی۔

پولیس کا کہنا ہے کہ مسلح افراد کی جانب سے جھل مگسی کے تھانہ کوٹڑہ پر بھی حملہ کیا گیا، جہاں پولیس اور مسلح افراد کے درمیان شدید فائرنگ کا تبادلہ ہوا۔

حکام کے مطابق علاقے میں تاحال فائرنگ کا سلسلہ جاری ہے اور صورتحال کشیدہ ہے۔ سکیورٹی فورسز اور پولیس نے ضلع بھر کے اہم راستوں کی ناکہ بندی کرتے ہوئے حملہ آوروں کی تلاش اور علاقے میں سرچ آپریشن شروع کر دیا ہے۔

حملے میں جانی و مالی نقصان کے حوالے سے فوری طور پر حتمی اطلاعات سامنے نہیں آسکی ہیں، جبکہ واقعے کی مزید تفصیلات کا انتظار ہے۔