وفاقی حکومت کا پینشن کی ادائیگی سے متعلق بڑا فیصلہ

اسلام آباد: وفاقی حکومت نے پنشن کی ادائیگی اور تصدیق کے طریقہ کار میں بڑی تبدیلی کرتے ہوئے پنشنرز کے لیے نئے ڈیجیٹل پنشن قواعد جاری کردیے ہیں۔

وزارت خزانہ کے مطابق اب پنشن کی ادائیگی ڈیجیٹل پنشن نظام کے ذریعے کی جائے گی، جبکہ پنشنرز کے لیے ہر 6 ماہ بعد نادرا کے ذریعے ڈیجیٹل تصدیق کرانا لازمی ہوگا۔

پنشنرز یہ تصدیق نادرا کی پاک آئی ڈی ایپ یا مجاز نادرا مراکز کے ذریعے کرا سکیں گے۔ نئے نظام کے تحت پنشن کی رقم براہِ راست پنشنر کے بینک اکاؤنٹ میں منتقل کی جائے گی۔

نئے قواعد کے مطابق پنشن کی تصدیق کے لیے مارچ اور ستمبر کا سابقہ شیڈول ختم کردیا گیا ہے اور بینک اب پنشنرز سے بائیومیٹرک تصدیق یا لائف سرٹیفکیٹ طلب نہیں کریں گے۔

وزارت خزانہ کے مطابق صرف ڈیجیٹل تصدیق نہ ہونے کی بنیاد پر پنشن اکاؤنٹ کو ڈورمنٹ نہیں کیا جائے گا، تاہم اگر مسلسل 6 ماہ تک ڈیجیٹل تصدیق نہ کرائی گئی تو پنشن کی منتقلی عارضی طور پر روک دی جائے گی۔

ڈیجیٹل تصدیق مکمل ہونے کے بعد پنشن کی رقم دوبارہ منتقل کردی جائے گی۔ حکومت کے مطابق نئے نظام کا مقصد پنشن کی ادائیگی اور تصدیق کے عمل کو مزید آسان، شفاف اور مکمل طور پر ڈیجیٹل بنانا ہے۔