سیکیورٹی فورسز کی بلوچستان میں کامیاب کارروائیاں، بھارتی حمایت یافتہ 11 دہشت گرد ہلاک

کوئٹہ: سیکیورٹی فورسز نے بلوچستان کے اضلاع خاران اور واشک میں انٹیلی جنس بیسڈ آپریشنز کرتے ہوئے 11 دہشت گردوں کو ہلاک کردیا۔

پاک فوج کے شعبہ تعلقات عامہ (آئی ایس پی آر) کے مطابق 6 اور 7 ستمبر کو خاران اور واشک میں کارروائیاں کی گئیں۔ خاران میں دہشت گردوں کی جانب سے سڑک بلاک کرکے ٹریفک کی روانی متاثر کرنے کی کوشش ناکام بنا دی گئی، جبکہ کارروائی کے دوران 8 دہشت گرد ہلاک ہوئے۔

آئی ایس پی آر کے مطابق واشک میں سیکیورٹی فورسز نے دہشت گردوں کے ٹھکانے کو مؤثر کارروائی کے ذریعے تباہ کیا، جس کے نتیجے میں مزید 3 دہشت گرد مارے گئے۔

ترجمان پاک فوج کے مطابق واشک میں کارروائی کے دوران 2.9 ٹن دھماکا خیز مواد بھی برآمد کیا گیا، جسے دہشت گرد مبینہ طور پر دیسی ساختہ دھماکا خیز آلات (آئی ای ڈیز) کی تیاری میں استعمال کر رہے تھے۔

آئی ایس پی آر نے بتایا کہ علاقے میں موجود دیگر دہشت گردوں کے خاتمے کے لیے سینیٹائزیشن آپریشن جاری ہے۔ ترجمان کے مطابق ’’عزمِ استحکام‘‘ کے تحت غیر ملکی سرپرستی میں ہونے والی دہشت گردی کے خلاف کارروائیاں بھرپور انداز میں جاری رکھی جائیں گی۔