حکومت کا غربت ناپنے کا پیمانہ تبدیل کرنے پر غور

حکومت پاکستان میں غربت کی درست صورتحال جاننے اور عوام کو درپیش مسائل کا بہتر انداز میں جائزہ لینے کے لیے غربت ناپنے کا موجودہ طریقہ کار تبدیل کرنے پر غور کر رہی ہے۔ مجوزہ تبدیلیوں کے تحت غربت کی پیمائش میں صحت، تعلیم اور معیارِ زندگی کے ساتھ موسمیاتی تبدیلیوں، غذائی قلت، بے روزگاری، ڈیجیٹل سہولتوں تک عدم رسائی اور دیگر سماجی مسائل کو بھی شامل کرنے کی تجاویز زیر غور ہیں۔

اس سلسلے میں وزارتِ منصوبہ بندی اور آکسفورڈ یونیورسٹی کے ادارے آکسفورڈ پاورٹی اینڈ ہیومن ڈیولپمنٹ انیشی ایٹو کے درمیان مشاورت ہوئی ہے۔ اس دوران کثیرالجہتی غربت اشاریے کو جدید تقاضوں سے ہم آہنگ کرنے اور محروم طبقات کی بہتر نشاندہی کے لیے نئے عوامل شامل کرنے پر تبادلہ خیال کیا گیا۔

وفاقی وزیر منصوبہ بندی احسن اقبال نے تقریب سے خطاب کرتے ہوئے کہا کہ سیاسی عدم استحکام، پالیسیوں میں تسلسل کی کمی، معاشی بحرانوں اور موسمیاتی تبدیلیوں کے باعث پاکستان کی ترقی متاثر ہوئی ہے۔ غربت میں کمی کے لیے سماجی شعبوں میں سرمایہ کاری، مقامی حکومتوں کو بااختیار بنانے اور مستند اعداد و شمار کی بنیاد پر ترقیاتی ترجیحات طے کرنا ضروری ہے۔

مجوزہ جائزے میں صحت، تعلیم اور معیارِ زندگی کے موجودہ اشاریوں کے علاوہ آبادی کے دباؤ، موسمیاتی آفات، عدم تحفظ، نوجوانوں کی محرومیوں، صنفی عدم مساوات، غذائیت کی کمی، بچوں کی نشوونما میں رکاوٹوں اور نقل مکانی جیسے عوامل کو بھی مدنظر رکھنے کی تجویز ہے۔

وزارتِ منصوبہ بندی کے مطابق غربت کی نئی پیمائش کے لیے پاکستان سوشل اینڈ لیونگ اسٹینڈرڈز میژرمنٹ سروے 2026-27 کے اعداد و شمار سے مدد لی جائے گی۔ نئے اشاریوں کی شمولیت کے لیے قابلِ اعتماد معلومات اور مستند طریقہ کار کو بنیادی اہمیت دی جائے گی۔

احسن اقبال نے غربت میں اضافے کی وجوہات بیان کرتے ہوئے سیاسی عدم استحکام، معاشی بحرانوں، ترقیاتی پالیسیوں میں عدم تسلسل، کورونا وبا اور تباہ کن سیلابوں کا ذکر کیا۔ ان کا کہنا تھا کہ اگر معاشی ترقی کی رفتار آبادی میں اضافے سے کم رہی تو روزگار کے مواقع پیدا کرنے، غربت کم کرنے اور نوجوانوں کو روزگار فراہم کرنے میں مشکلات مزید بڑھ سکتی ہیں۔

حکومت اور آکسفورڈ کے متعلقہ ادارے کے درمیان مجوزہ تعاون کے تحت قومی اور صوبائی اسمبلیوں کے انتخابی حلقوں کی سطح پر بھی غربت کا تجزیہ کرنے کی تجویز ہے۔ اس مقصد کے لیے 2023 کی مردم شماری اور مکانات کی گنتی کے اعداد و شمار استعمال کیے جا سکتے ہیں۔

حکام کے مطابق انتخابی حلقوں کی سطح پر غربت کا تجزیہ تیار کیا جا چکا ہے، تاہم اس کے ممکنہ سیاسی اثرات کے پیش نظر اسے عوام کے سامنے لانے کے بارے میں حتمی فیصلہ نہیں کیا گیا۔

ماہرین کے مطابق غربت کی پیمائش کے طریقہ کار میں تبدیلی کا اصل مقصد محروم آبادیوں کی درست نشاندہی اور ترقیاتی وسائل کی منصفانہ تقسیم ہونا چاہیے، تاکہ حکومتی اقدامات کے ذریعے غربت میں کمی لانے کے لیے مؤثر حکمت عملی مرتب کی جا سکے۔