تھرپارکر: اسپتال میں آکسیجن سلنڈر پھٹنے سے حاملہ خاتون سمیت 10 افراد جاں بحق

مٹھی: تھرپارکر کے علاقے ننگرپارکر میں دیہی مرکز صحت دانوداندل میں آکسیجن سلنڈر پھٹنے اور آگ لگنے سے حاملہ خاتون سمیت 10 افراد جاں بحق جبکہ 5 سے زائد زخمی ہوگئے۔

ریسکیو حکام کے مطابق واقعے کی اطلاع ملتے ہی امدادی ٹیمیں اور فائر بریگیڈ کا عملہ جائے وقوعہ پر پہنچ گیا۔ زخمیوں کو فوری طبی امداد کے لیے اسپتال منتقل کیا گیا۔

ابتدائی اطلاعات کے مطابق ایک حاملہ خاتون ایمبولینس میں موجود تھی جبکہ عملہ آکسیجن سلنڈر لگا رہا تھا کہ اسی دوران دھماکا ہوگیا اور آگ بھڑک اٹھی۔

پولیس کے مطابق جاں بحق افراد میں ڈسپنسر، ایمبولینس ڈرائیور، چوکیدار اور دیگر ملازمین بھی شامل ہیں۔ ابتدائی معلومات کے مطابق حاملہ خاتون کے ساتھ موجود دو تیماردار بھی جان سے ہاتھ دھو بیٹھے۔

دھماکے کے بعد آگ نے ایمبولینس کو اپنی لپیٹ میں لے لیا، جس کے نتیجے میں گاڑی مکمل طور پر جل کر تباہ ہوگئی۔ ریسکیو حکام کے مطابق ایک شدید زخمی شخص سول اسپتال مٹھی منتقل کیے جانے کے دوران دم توڑ گیا، جس کے بعد جاں بحق افراد کی تعداد 10 ہوگئی۔

ریسکیو ٹیموں نے ایک شیرخوار بچے اور ایک خاتون سمیت متعدد زخمیوں کو اسپتال منتقل کیا۔ جاں بحق ہونے والے بعض افراد کی شناخت کرلی گئی ہے، جبکہ دیگر کی شناخت کا عمل جاری ہے۔

انتظامیہ، محکمہ صحت اور امدادی ٹیمیں جائے وقوعہ پر موجود ہیں۔ حکام کے مطابق دھماکے کی وجوہات اور واقعے کی نوعیت جاننے کے لیے مزید تحقیقات کی جا رہی ہیں۔