یوم دفاع، شہداء کی قربانیاں ہمارے لیے مشعلِ راہ ہیں، وزیراعلیٰ بلوچستان

کوئٹہ: وزیراعلیٰ بلوچستان میر سرفراز بگٹی نے یوم دفاع کے موقع پر اپنے پیغام میں 6 ستمبر کو ملکی تاریخ کا ناقابلِ فراموش دن قرار دیتے ہوئے وطن کے دفاع کے لیے جانوں کا نذرانہ پیش کرنے والے شہداء اور غازیوں کو خراج عقیدت پیش کیا ہے۔

میر سرفراز بگٹی نے کہا کہ 1965ء کے شہداء نے دفاع وطن کی ایسی عظیم مثال قائم کی جو قوم کے لیے ہمیشہ باعثِ فخر رہے گی۔ شہداء کی قربانیاں آج بھی پاکستانی قوم کے لیے مشعلِ راہ ہیں، جبکہ پاک فوج کے بہادر جوانوں کی خدمات کو بھی سلام پیش کرتے ہیں۔

وزیراعلیٰ بلوچستان کا کہنا تھا کہ پاکستان کے دفاع اور سلامتی کے معاملے پر قوم اور افواج پاکستان متحد ہیں اور ملکی خودمختاری و سلامتی پر کسی قسم کا سمجھوتہ نہیں کیا جائے گا۔

انہوں نے کہا کہ شہداء کے خاندان پوری قوم کے لیے قابل احترام ہیں اور ان کی قربانیوں کو کبھی فراموش نہیں کیا جاسکتا۔ بلوچستان کے عوام بھی ملکی دفاع کے لیے ہمیشہ پرعزم رہے ہیں اور قومی سلامتی کے لیے اپنا کردار ادا کرتے رہیں گے۔

میر سرفراز بگٹی نے کہا کہ قومی اتحاد پاکستان کی سب سے بڑی طاقت ہے، اسی اتحاد اور یکجہتی کے ذریعے ملک کی آزادی، خودمختاری اور سلامتی کا ہر قیمت پر دفاع کیا جائے گا۔