دکی میں مسلح افراد کا حملہ، تین چوکیدار جاں بحق، دو لاپتہ

دکی: تحصیل دکی کے علاقے جھالار میں نامعلوم مسلح افراد کے حملے میں سردار اکبر خان ناصر کے زمینداری ایریا میں تعینات تین چوکیدار جاں بحق جبکہ دو تاحال لاپتہ ہیں۔

ایس پی دکی منصور احمد بزدار کے مطابق تینوں افراد سردار اکبر خان ناصر کی زمینداری پر بطور چوکیدار تعینات تھے۔ جاں بحق ہونے والوں کی شناخت غنو ولد خدائیداد، آغا جان اور عزت خان کے نام سے ہوئی ہے، جو افغانستان کے رہائشی تھے۔

پولیس کے مطابق واقعے کی اطلاع ملنے پر ڈی آئی جی لورالائی رینج اور ایس پی دکی کی ہدایت پر پولیس ٹیم نے جھالار کے علاقے پوڑھ پہاڑی پہنچ کر تینوں چوکیداروں کی لاشیں برآمد کیں، جنہیں ضروری کارروائی کے لیے ڈی ایچ کیو ہسپتال دکی منتقل کردیا گیا۔

پولیس کا کہنا ہے کہ فائرنگ کے بعد سردار اکبر خان ناصر کے دو دیگر چوکیدار نادر خان اور بشیر خان لاپتہ ہیں، جن کی تلاش جاری ہے۔

پولیس کے مطابق جھالار کے علاقے میں اس سے قبل بھی سردار اکبر خان ناصر کے زمینداری ایریا میں تعینات چوکیداروں پر متعدد حملے ہوچکے ہیں۔ واقعے کی مزید تحقیقات جاری ہیں جبکہ حملہ آوروں کی تلاش بھی شروع کردی گئی ہے۔