اسپیکر قومی اسمبلی ایاز صادق کی وزیراعلیٰ سیکرٹریٹ آمد، بلوچستان کی سیاسی قیادت سے ملاقات

کوئٹہ: اسپیکر قومی اسمبلی سردار ایاز صادق نے وزیراعلیٰ سیکرٹریٹ کوئٹہ کا دورہ کیا، جہاں انہوں نے وزیراعلیٰ بلوچستان میر سرفراز بگٹی، صوبائی کابینہ کے ارکان اور اپوزیشن اراکین سے ملاقات کی۔

اس موقع پر گفتگو کرتے ہوئے سردار ایاز صادق نے کہا کہ بلوچستان سے ان کا تعلق محض سیاسی نہیں بلکہ جذباتی اور خاندانی بھی ہے۔ ان کے مطابق بلوچستان سے ان کے خاندان کی تین نسلوں سے وابستگی ہے اور اس صوبے کے ساتھ محبت نسل در نسل چلی آرہی ہے۔

انہوں نے کہا کہ بلوچستان ان کے لیے اجنبی نہیں، یہاں کے لوگوں سے ان کا دیرینہ اور گہرا تعلق ہے۔ بلوچستان آمد پر ہمیشہ اپنائیت اور محبت کا احساس ہوتا ہے، جبکہ صوبے کے عوام نے انہیں ہمیشہ عزت اور خلوص دیا ہے۔

اسپیکر قومی اسمبلی کا کہنا تھا کہ بلوچستان کی مٹی، یہاں کے لوگ اور روایات ان کے لیے خصوصی اہمیت رکھتی ہیں۔ صوبے کے عوام کی محبت اور خلوص کے وہ ہمیشہ معترف رہے ہیں اور بلوچستان کے تمام اراکین سمیت ہر فرد کے لیے ان کے دروازے ہمیشہ کھلے ہیں۔

سردار ایاز صادق نے کہا کہ بلوچستان پاکستان کا اہم ترین صوبہ ہے اور اس کی ترقی دراصل پورے ملک کی ترقی ہے۔ وفاق بلوچستان کے عوام کی خوشحالی، ترقی اور مسائل کے حل کے لیے ہر ممکن تعاون جاری رکھے گا۔

وزیراعلیٰ بلوچستان میر سرفراز بگٹی نے اسپیکر قومی اسمبلی کی کوئٹہ آمد کو صوبے کے لیے باعثِ مسرت اور اعزاز قرار دیا۔ انہوں نے کہا کہ بلوچستان میں حکومت اور اپوزیشن کے درمیان جمہوری روایات کے ساتھ باہمی احترام کی روایت بھی موجود ہے۔

میر سرفراز بگٹی نے کہا کہ بلوچستان اسمبلی میں حکومت اور اپوزیشن اراکین ایک دوسرے پر سیاسی تنقید ضرور کرتے ہیں، تاہم اخلاقی اقدار اور عزت و احترام کی مضبوط روایات برقرار ہیں۔ حکومت اور اپوزیشن اراکین کا ایک ساتھ بیٹھنا بلوچستان کے مثبت سیاسی کلچر کی عکاسی کرتا ہے۔

وزیراعلیٰ نے مزید کہا کہ حکومت اور اپوزیشن کا باہمی احترام اور مل بیٹھ کر گفتگو کرنا بیرونِ صوبہ سے آنے والے مہمانوں کو بلوچستان کے مثبت سیاسی ماحول کا پیغام دیتا ہے۔