بلوچستان بھر میں سابق لیویز اہلکاروں کے تبادلوں پر تشویش، فیصلہ واپس لینے کا مطالبہ

بلوچستان بھر میں سابق لیویز اہلکاروں کے تبادلوں پر تشویش، فیصلہ واپس لینے کا مطالبہ

بلوچستان کے مختلف اضلاع سے پولیس میں ضم ہونے والے سابق لیویز اہلکاروں نے دور دراز اضلاع میں تبادلوں کے احکامات پر شدید تحفظات کا اظہار کرتے ہوئے اسے ملازمین کے لیے مشکلات میں اضافے کا سبب قرار دیا ہے۔*
سابق لیویز اہلکاروں کا کہنا ہے کہ موجودہ مہنگائی کے دور میں تقریباً 50 ہزار روپے ماہانہ تنخواہ میں گھریلو اخراجات پورے کرنا پہلے ہی دشوار ہے، جبکہ دور دراز اضلاع میں تبادلے کی صورت میں اضافی سفری، رہائش اور دیگر اخراجات برداشت کرنا ان کے لیے مزید مشکلات پیدا کرے گا۔*
انہوں نے کہا کہ کئی ملازمین اپنے آبائی اضلاع میں اہلخانہ کے ساتھ رہائش پذیر ہیں اور اچانک دور دراز علاقوں میں تعیناتی سے نہ صرف انہیں مالی مشکلات کا سامنا ہوگا بلکہ گھریلو مسائل بھی بڑھیں گے۔*
سابق لیویز اہلکاروں نے وزیراعلیٰ بلوچستان اور متعلقہ اعلیٰ حکام سے مطالبہ کیا ہے کہ ملازمین کے مسائل اور موجودہ معاشی حالات کو مدنظر رکھتے ہوئے تبادلوں کے احکامات پر نظرثانی کی جائے اور ممکنہ حد تک اہلکاروں کو اپنے آبائی یا قریبی اضلاع میں تعینات کیا جائے۔