آٹے کی بڑھتی قیمتوں پر قابو پایا جائے، غریب عوام دو وقت کی روٹی کو ترس رہے ہیں، مولانا عبدالرحمن رفیق

آٹے کی بڑھتی قیمتوں پر قابو پایا جائے، غریب عوام دو وقت کی روٹی کو ترس رہے ہیں، مولانا عبدالرحمن رفیق

کوئٹہ: جمعیت علماء اسلام ضلع کوئٹہ کے امیر شیخ الحدیث مولانا عبدالرحمن رفیق، جنرل سیکرٹری حاجی عین اللہ شمس، سینئر نائب امیر مولانا خورشید احمد، ڈپٹی سیکرٹری جنرل حاجی بشیر احمد کاکڑ اور دیگر رہنماؤں نے آٹے کی بڑھتی ہوئی قیمتوں پر شدید تشویش کا اظہار کرتے ہوئے حکومت سے فوری اقدامات کا مطالبہ کیا ہے۔

اپنے مشترکہ بیان میں رہنماؤں نے کہا کہ آٹے کی قیمتیں روز بروز عام آدمی کی قوتِ خرید سے باہر ہوتی جارہی ہیں، جبکہ صوبے کے غریب عوام دو وقت کی سوکھی روٹی کے ایک ایک لقمے کے لیے ترس رہے ہیں۔ حکومت فوری طور پر آٹے کی قیمتوں میں استحکام لانے کے لیے مؤثر اقدامات کرے۔

مولانا عبدالرحمن رفیق نے صوبائی محکمہ خوراک کی کارکردگی پر تنقید کرتے ہوئے کہا کہ نااہلی، بدانتظامی اور مبینہ بدعنوانی نے محکمہ خوراک جیسے اہم عوامی ادارے کو بحران سے دوچار کردیا ہے۔ ان کا کہنا تھا کہ حساس اور عوامی مفاد سے وابستہ محکمے کی ذمہ داری ایسے افراد کو سونپنا جو عوام کو ریلیف فراہم کرنے میں ناکام ہوں، صوبے کے عوام کے ساتھ ناانصافی ہے۔

انہوں نے کہا کہ حکمران عوامی مشکلات کا ازالہ کرنے کے بجائے نمود و نمائش میں مصروف ہیں، جبکہ مہنگائی نے غریب خاندانوں کی مشکلات میں مزید اضافہ کردیا ہے۔

جمعیت رہنماؤں نے مطالبہ کیا کہ حکومت آٹے کی قیمتوں پر فوری قابو پانے کے ساتھ ساتھ غریب عوام کو عملی ریلیف فراہم کرے۔ محض اعلانات اور تشہیری سرگرمیوں سے عوام کے مسائل حل نہیں ہوں گے، حکومت کو اپنی ذمہ داری کا احساس کرتے ہوئے فوری اور عملی اقدامات کرنا ہوں گے۔