میر رضا قتل کیس میں مشکوک گیسٹ ہاؤس سے متعلق پیش رفت

کراچی: میر رضا قتل کیس میں مشکوک گیسٹ ہاؤس سے متعلق پولیس کی تحقیقات میں اہم پیش رفت سامنے آئی ہے۔ پولیس نے گیسٹ ہاؤس کو سیل کرکے عملے کے 6 افراد کو حراست میں لے لیا ہے۔

پولیس حکام کے مطابق سوئفٹ کار میں گیسٹ ہاؤس آنے والے 4 افراد کو بھی حراست میں لے کر تفتیش کا حصہ بنایا گیا ہے، جس کے بعد کیس میں مجموعی طور پر 19 افراد شاملِ تفتیش ہوچکے ہیں۔

حکام کا کہنا ہے کہ زیرِ حراست افراد سے نئی تحقیقاتی ٹیم بھی پوچھ گچھ کرے گی، جبکہ گیسٹ ہاؤس سے متعلق مختلف پہلوؤں کا جائزہ لیا جا رہا ہے۔

دوسری جانب میر رضا کے والد حسین نے گزشتہ روز میڈیا سے گفتگو کرتے ہوئے بتایا تھا کہ ان کے بیٹے کا بزنس پارٹنر بھی لاپتا ہے اور گیسٹ ہاؤس کے عملے سے ہونے والی تحقیقات کے بارے میں اہلخانہ کو آگاہ نہیں کیا گیا۔

مقتول کے والد نے یہ بھی سوال اٹھایا تھا کہ گیسٹ ہاؤس کی سی سی ٹی وی فوٹیج اب تک سامنے کیوں نہیں لائی گئی۔ ان کا کہنا تھا کہ انہیں نئی تحقیقاتی کمیٹی سے امید ہے کہ وہ معاملے کی حقیقت سامنے لائے گی۔