پرامن احتجاج آئینی حق ہے، اسے دبایا نہیں جا سکتا، ام رباب چانڈیو

​سکھر ( رپورٹ اسلم سومرو): سندھ کی بیٹی اور انسانی حقوق کی رہنما ام رباب نے ببرلو بائی پاس پر پریا کماری ایکشن کمیٹی کے پرامن دھرنے پر پولیس کی جانب سے رات کے اندھیرے میں کی جانے والی بزدلانہ کارروائی، تشدد اور وکلا، صحافیوں، سماجی کارکنوں سمیت معصوم بچوں کے والدین کی گرفتاری کی شدید الفاظ میں مذمت کی ہے۔ اپنے ایک اہم ویڈیو پیغام میں ام رباب نے پولیس گردی اور ریاستی جبر کو سخت تنقید کا نشانہ بناتے ہوئے کہا کہ اپنے جگر کے ٹکڑوں اور معصوم پریا کماری کی محفوظ بازیابی کے لیے پرامن احتجاج کرنے والے شہریوں پر لاٹھی چارج اور ان کی گرفتاری اس نظام کی مکمل ناکامی اور بدترین فاشزم کا ثبوت ہے۔ انہوں نے پولیس اور صوبائی انتظامیہ کے رویے پر گہری تشویش کا اظہار کرتے ہوئے واضح کیا کہ اپنے حقوق اور بچوں کی سلامتی کے لیے آواز اٹھانا کوئی جرم نہیں بلکہ آئینی و قانونی حق ہے، اور مظلوموں کو دبا کر حق کی آواز کو دبايا نہیں جا سکتا۔ انہوں نے فرعون اور تاریخ کے دیگر ظالموں کا حوالہ دیتے ہوئے کہا کہ ظالموں کا انجام ہمیشہ رسوائی ہی رہا ہے اور تاریخ کسی کو معاف نہیں کرتی۔ ام رباب نے اعلیٰ حکام، آئی جی سندھ اور اربابِ اختیار سے مطالبہ کیا کہ ببرلو بائی پاس دھرنے سے گرفتار کیے گئے تمام صحافیوں، وکلا اور پریا کماری ایکشن کمیٹی کے رہنماؤں کو فوراً بلا مشروط رہا کیا جائے اور معصوم پریا کماری کی جلد از جلد بازیابی کو یقینی بنایا جائے۔