لاہور میں وفاقی وزیر اطلاعات کی گاڑی کے قریب ہوائی فائرنگ کرنے والا نوجوان گرفتار

لاہور: ڈیفنس کے علاقے میں وفاقی وزیر اطلاعات عطا اللہ تارڑ کی گاڑی کے قریب ہوائی فائرنگ کرنے والے نوجوان کو پولیس نے گرفتار کر لیا۔

پولیس کے مطابق واقعہ گزشتہ رات ڈیفنس اے کے علاقے میں پیش آیا، جہاں ایک کار سوار نوجوان نے وفاقی وزیر کی گاڑی کو اوورٹیک کیا اور چند ہوائی فائر کیے۔ واقعے کے بعد پولیس نے فوری کارروائی کرتے ہوئے ملزم کو اسلحے سمیت حراست میں لے لیا، جبکہ اس کے زیر استعمال گاڑی بھی قبضے میں لے لی گئی۔

پولیس حکام کا کہنا ہے کہ ملزم کی گرفتاری کے لیے سیف سٹی کیمروں، جدید ٹیکنالوجی اور مختلف شواہد سے مدد حاصل کی گئی، جس کے بعد اسے ٹریس کرکے گرفتار کیا گیا۔

وفاقی وزیر اطلاعات عطا اللہ تارڑ نے واقعے سے متعلق بتایا کہ وہ اپنے اہل خانہ کے ساتھ سفر کر رہے تھے کہ ایک گاڑی نے بائیں جانب سے انہیں کراس کیا، جس کے بعد نوجوان نے پانچ ہوائی فائر کیے۔ ان کے بقول انہوں نے فوری طور پر گاڑی کا تعاقب کیا اور قریبی پولیس ناکے کو اطلاع دی۔

عطا اللہ تارڑ نے واضح کیا کہ ابتدائی طور پر انہیں نہیں لگتا کہ فائرنگ ان کو نشانہ بنانے کے لیے کی گئی تھی، بلکہ یہ ہوائی فائرنگ کا واقعہ تھا۔ انہوں نے کہا کہ پولیس واقعے کی مختلف پہلوؤں سے تحقیقات کر رہی ہے۔