افغان طالبان سے شکوہ ہے کہ آپ اپنی زمین پاکستان کیخلاف استعمال ہونے سے نہیں روک رہے: حافظ نعیم

اسلام آباد: امیر جماعت اسلامی حافظ نعیم الرحمن نے افغانستان کی عبوری حکومت پر زور دیا ہے کہ وہ اپنی سرزمین پاکستان کے خلاف استعمال ہونے سے روکنے کے لیے مؤثر اقدامات کرے، جبکہ دونوں ممالک کے درمیان اختلافات کے حل کے لیے مذاکرات اور جرگے کی روایت کو فروغ دینے کی ضرورت پر بھی زور دیا۔

نجی ٹی وی کے پروگرام جرگہ میں گفتگو کرتے ہوئے حافظ نعیم الرحمن نے کہا کہ افغان طالبان سے ان کا بڑا شکوہ یہ ہے کہ افغانستان کی سرزمین پاکستان کے خلاف استعمال ہو رہی ہے، جسے روکنے کے لیے مؤثر کارروائی کی جانی چاہیے۔

انہوں نے کہا کہ پاکستان اور افغانستان کے عوام کئی دہائیوں سے ایک دوسرے کے ساتھ کھڑے رہے ہیں۔ ان کے بقول اختلافات حکومتوں یا پالیسیوں کے درمیان ہو سکتے ہیں، لیکن دونوں ممالک کے عوام کو اس کی قیمت نہیں چکانی چاہیے۔

امیر جماعت اسلامی کا کہنا تھا کہ دونوں ملکوں کے تعلقات کو معمول پر لانے کے لیے ریاست پاکستان، مذہبی علما اور بین الاقوامی علما کی تنظیمیں اپنا کردار ادا کر سکتی ہیں۔ انہوں نے کہا کہ چین، روس اور ترکیہ جیسے ممالک بھی اس عمل میں معاونت کر سکتے ہیں، تاہم اصل ضرورت بات چیت کو ترجیح دینے کی ہے۔

انہوں نے مزید تجویز دی کہ اگر دونوں جانب کے قبائلی عمائدین کو مؤثر نمائندگی دی جائے تو ایک مشترکہ گریٹر جرگہ تشکیل دیا جا سکتا ہے، جو پاکستان اور افغانستان کے درمیان موجود مسائل کے حل میں اہم کردار ادا کر سکتا ہے۔