عبدوئی بارڈر کھلنے سے مکران اور ضلع کیچ کے عوام کو معاشی ریلیف ملے گا، ولید دشتی /زبیر زامرانی

مسلم لیگ (ن) یوتھ ونگ بلوچستان کے نائب صدر ولید دشتی اور مسلم لیگ (ن) یوتھ ونگ مکران ڈویژن کے صدر زبیر زامرانی نے عبدوئی بارڈر کھولنے کے فیصلے کا خیرمقدم کرتے ہوئے آئی جی ایف سی بلوچستان ساؤتھ میجر جنرل ظفر اقبال کا شکریہ ادا کیا ہے۔
اپنے مشترکہ بیان میں انہوں نے کہا کہ عبدوئی بارڈر کھلنے سے ضلع کیچ سمیت مکران کے عوام کو معاشی ریلیف ملے گا، مقامی تجارت کو فروغ حاصل ہوگا اور روزگار کے نئے مواقع پیدا ہونے کی راہ ہموار ہوگی۔
انہوں نے اس اقدام کو عوام دوست فیصلہ قرار دیتے ہوئے امید ظاہر کی کہ اس سے سرحدی علاقوں کے عوام کی مشکلات کم ہوں گی اور علاقے میں معاشی سرگرمیوں کو تقویت ملے گی