سیکیورٹی خدشات، چینی کمپنی کا سینڈک منصوبہ ایک ماہ میں بند کرنے کا انتباہ

کوئٹہ: بلوچستان میں امن و امان کی صورتحال پر تشویش کا اظہار کرتے ہوئے چینی کمپنی سینڈک میٹلز لمیٹڈ نے خبردار کیا ہے کہ اگر سیکیورٹی حالات بہتر نہ ہوئے تو سینڈک تانبہ و سونا منصوبے کی سرگرمیاں ایک ماہ کے اندر معطل کی جا سکتی ہیں۔

ذرائع کے مطابق کمپنی کے مینیجنگ ڈائریکٹر نے وفاقی وزارت توانائی (پیٹرولیم ڈویژن) کو خط لکھ کر منصوبے کو درپیش سیکیورٹی مسائل سے آگاہ کیا ہے۔ خط میں کہا گیا ہے کہ امن و امان کی صورتحال کے باعث منصوبے کے لیے ضروری سامان کی ترسیل اور سپلائی چین شدید متاثر ہو رہی ہے۔

کمپنی نے مؤقف اختیار کیا ہے کہ ٹرانسپورٹ روٹس کو درپیش خطرات اور لاجسٹک مسائل کے باعث کان کنی کے عمل کو معمول کے مطابق جاری رکھنا مشکل ہو گیا ہے، جبکہ چینی انجینئرز اور مقامی ملازمین کی حفاظت بھی ایک بڑا چیلنج بن چکی ہے۔

سینڈک منصوبہ بلوچستان کے ضلع چاغی میں واقع پاکستان کے اہم معدنی منصوبوں میں شمار ہوتا ہے، جہاں تانبے اور سونے کی پیداوار کی جاتی ہے۔ ماہرین کے مطابق منصوبے کی بندش سے پاکستان کی معیشت، روزگار اور پاک چین معاشی تعاون پر منفی اثرات مرتب ہو سکتے ہیں۔

حکام سے مطالبہ کیا گیا ہے کہ منصوبے کی سیکیورٹی اور سپلائی نظام کو بہتر بنانے کے لیے فوری اقدامات کیے جائیں تاکہ معدنی پیداوار کا سلسلہ متاثر نہ ہو۔