ٹرمپ کا ایران پر 9 نومبر کو دوبارہ حملوں کا امکان، وائٹ ہاؤس میں سکیورٹی ٹیم سے اہم مشاورت

واشنگٹن: امریکی صدر ڈونلڈ ٹرمپ نے ایران کے خلاف فوجی کارروائیاں دوبارہ شروع کرنے کے امکان پر اپنی قومی سلامتی ٹیم کے ساتھ اہم مشاورت کی ہے، جس کے بعد خطے میں ایک بار پھر کشیدگی بڑھنے کے خدشات پیدا ہوگئے ہیں۔

امریکی حکام کے مطابق وائٹ ہاؤس میں بدھ اور جمعرات کو اعلیٰ سطح کے اجلاس منعقد ہوئے، جن میں ایران کے خلاف ممکنہ فوجی کارروائیوں اور جنگ دوبارہ شروع کرنے سے متعلق امور پر غور کیا گیا۔ تاہم ان اجلاسوں میں ہونے والے فیصلوں یا کسی نئے آپریشن کی منظوری کے بارے میں تفصیلات سامنے نہیں آئیں۔

رپورٹ میں 9 نومبر کو مشرقِ وسطیٰ میں نئے چاند کی کیفیت کا حوالہ دیتے ہوئے کہا گیا ہے کہ اس رات چاندنی نہ ہونے کے باعث اندھیرا زیادہ ہوگا، تاہم اسے کسی ممکنہ حملے کی حتمی تاریخ یا فوجی کارروائی کے منصوبے کی تصدیق نہیں سمجھا جا سکتا۔

اس سے قبل اوول آفس میں صحافیوں سے گفتگو کرتے ہوئے صدر ٹرمپ نے کہا تھا کہ واشنگٹن ایران کے خلاف جنگ دوبارہ شروع کرنے کے بارے میں جلد فیصلہ کرے گا۔

قومی سلامتی ٹیم کے اجلاسوں اور صدر ٹرمپ کے بیان کے باوجود امریکی حکومت کی جانب سے ایران پر کسی نئے حملے کا باضابطہ اعلان نہیں کیا گیا۔