ترکیہ کی پارلیمنٹ نے پاکستان اور سعودی عرب کے ساتھ مکہ مشترکہ دفاعی معاہدے کی توثیق کردی

ترکیہ کی پارلیمنٹ نے پاکستان اور سعودی عرب کے ساتھ طے پانے والے مکہ مشترکہ دفاعی معاہدے کی منظوری دے دی ہے۔ پارلیمانی ووٹنگ میں معاہدے کے حق میں 279 جبکہ مخالفت میں 119 ووٹ ڈالے گئے۔

ترک میڈیا کے مطابق 398 ارکان نے ووٹنگ میں حصہ لیا، جس کے بعد معاہدے کو پارلیمانی توثیق حاصل ہوگئی۔

پارلیمنٹ کی خارجہ امور کمیٹی کے چیئرمین نے کہا کہ یہ معاہدہ دفاعی نوعیت کا ہے اور اس کا مقصد کسی تیسرے ملک کے خلاف جارحانہ کارروائی کرنا نہیں بلکہ خطے میں سکیورٹی تعاون کو فروغ دینا ہے۔

معاہدے کے تحت تینوں ممالک کے درمیان مشترکہ دفاع، عسکری تعاون اور سکیورٹی کے شعبوں میں اشتراک کو فروغ دیا جائے گا۔ اس کی ایک اہم شق کے مطابق کسی ایک رکن ملک پر مسلح حملے کو تینوں ممالک پر حملہ تصور کیا جائے گا۔

پاکستان، سعودی عرب اور ترکیہ نے 7 اگست 2026 کو مکہ مکرمہ میں اس معاہدے پر دستخط کیے تھے۔ دستخط کی تقریب میں وزیراعظم شہباز شریف، سعودی ولی عہد محمد بن سلمان اور ترک صدر رجب طیب اردوان شریک تھے۔

ترکیہ کی پارلیمنٹ سے منظوری کے باوجود ترک فوج کی بیرون ملک تعیناتی کے لیے علیحدہ پارلیمانی اجازت درکار ہوگی۔