زیارت شہداء پولیس اہلکاروں کے لواحقین کے لیے ایک کروڑ 11 لاکھ روپے معاوضے کے احکامات جاری

کوئٹہ: حکومت بلوچستان نے زیارت میں شہید ہونے والے پولیس اہلکاروں کے لواحقین کے لیے فی اہلکار ایک کروڑ 11 لاکھ روپے معاوضے کے ریلیز آرڈرز جاری کر دیے ہیں۔

وزیراعلیٰ بلوچستان میر سرفراز بگٹی کی ہدایت پر معاوضوں کی ادائیگی کا عمل تیز رفتاری سے مکمل کیا گیا، جبکہ تمام شہداء کے خاندانوں کو رقم ان کی دہلیز پر پہنچانے کے انتظامات کیے جا رہے ہیں۔

حکومت بلوچستان کا کہنا ہے کہ شہداء کے خاندانوں کی کفالت، اہل خانہ کی فلاح و بہبود اور شہداء کے بچوں کے تعلیمی اخراجات بھی حکومت برداشت کرے گی۔

وزیراعلیٰ بلوچستان نے کہا کہ مالی معاوضہ انسانی جان کا نعم البدل نہیں ہو سکتا، تاہم حکومت مشکل وقت میں شہداء کے لواحقین کے ساتھ کھڑی ہے اور ہر ممکن تعاون جاری رکھے گی۔