بلوچستان کی ترقی پاکستان کی ترقی ہے، وسائل میں اضافے کا فیصلہ تمام صوبوں نے رضاکارانہ طور پر کیا، وزیراعظم شہباز شریف

اسلام آباد: وزیراعظم محمد شہباز شریف نے کہا ہے کہ بلوچستان پر خرچ کیے جانے والے وسائل کے حوالے سے ان کے مؤقف کو غلط انداز میں پیش کیا گیا، جبکہ حقیقت یہ ہے کہ انہوں نے ہمیشہ بلوچستان کی ترقی کو پاکستان کی مجموعی ترقی سے جوڑ کر دیکھا ہے۔

قومی اسمبلی کے اجلاس سے خطاب کرتے ہوئے وزیراعظم نے کہا کہ ان کی تقریر کا ریکارڈ نکال لیا جائے، انہوں نے واضح طور پر کہا تھا کہ چاروں صوبوں نے رضاکارانہ طور پر قومی مالیاتی کمیشن (این ایف سی) ایوارڈ کے تحت بلوچستان کے حصے میں سو فیصد اضافہ کیا تھا اور یہ فیصلہ خوش دلی سے کیا گیا تھا۔

وزیراعظم نے کہا کہ انہوں نے یہ بات ہمیشہ ادب اور عاجزی کے ساتھ کی ہے اور آج بھی ان کا یہی مؤقف ہے کہ جب تک چاروں صوبے ترقی کے سفر میں برابر کے شریک نہیں ہوں گے، اس وقت تک پاکستان کی حقیقی ترقی ممکن نہیں۔

شہباز شریف نے کہا کہ ان کی بات کو قومی اسمبلی میں قائدِ حزبِ اختلاف نے مختلف رنگ دیا، جس پر انہیں افسوس ہے، تاہم ہر شخص کو اپنے نقطۂ نظر کے اظہار کا حق حاصل ہے۔

انہوں نے اس عزم کا اعادہ کیا کہ وفاق تمام صوبوں بالخصوص بلوچستان کی ترقی، خوشحالی اور عوامی فلاح کے لیے اپنی ذمہ داریاں پوری کرتا رہے گا۔