سام سنگ گلیکسی اے 27 کے ممکنہ فیچرز اور نیا رنگ لیک ہو گیا

سام سنگ کے متوقع اسمارٹ فون گلیکسی اے 27 سے متعلق نئی لیکس سامنے آگئی ہیں، جن میں ڈیوائس کے ایک نئے رنگ اور ممکنہ فیچرز کی تفصیلات شامل ہیں۔

تازہ لیک کے مطابق گلیکسی اے 27 کو ایک نئے سبز مائل رنگ میں پیش کیا جا سکتا ہے، جسے کمپنی ممکنہ طور پر “آسم منٹ” (Awesome Mint) کا نام دے گی۔ اس سے قبل منظرِ عام پر آنے والی رینڈر تصاویر میں فون کو تین مختلف رنگوں میں دکھایا گیا تھا، تاہم نئی تصاویر ایک ریٹیل لسٹنگ کے ذریعے سامنے آئی ہیں۔

رپورٹس کے مطابق سام سنگ گلیکسی اے 27 میں کوالکوم اسنیپ ڈریگن 6 جین 3 چپ سیٹ استعمال کیے جانے کا امکان ہے۔ فون 8 جی بی ریم اور 256 جی بی تک اسٹوریج کے مختلف آپشنز کے ساتھ دستیاب ہو سکتا ہے، جبکہ اس میں اینڈرائیڈ 16 پر مبنی ون یو آئی 8.5 دیا جا سکتا ہے۔

متوقع فیچرز میں 6.7 انچ کا فل ایچ ڈی پلس ڈسپلے، 50 میگا پکسل کا مین کیمرہ اور 5000 ایم اے ایچ صلاحیت کی بیٹری شامل ہیں، جو صارفین کو بہتر کارکردگی اور طویل بیٹری بیک اپ فراہم کر سکتی ہے۔

اگرچہ کمپنی نے ابھی تک گلیکسی اے 27 کی لانچ تاریخ یا حتمی تفصیلات کا اعلان نہیں کیا، تاہم امکان ظاہر کیا جا رہا ہے کہ یہ اسمارٹ فون 2026 کی دوسری ششماہی کے دوران متعارف کرایا جائے گا۔ البتہ تمام لیک شدہ معلومات کی تصدیق سام سنگ کے باضابطہ اعلان کے بعد ہی ممکن ہوگی