تمباکو نوشی سے مثانے کے کینسر کا خطرہ کئی گنا بڑھ جاتا ہے، ماہرین کا انتباہ

ویب ڈیسک: طبی ماہرین نے خبردار کیا ہے کہ تمباکو نوشی صرف پھیپھڑوں کے کینسر کا باعث نہیں بنتی بلکہ مثانے کے کینسر کے خطرات میں بھی نمایاں اضافہ کرتی ہے۔

امراضِ گردہ کے ماہر ڈاکٹر انکور بھٹناگر کے مطابق سگریٹ نوش افراد میں مثانے کے کینسر کا امکان غیر تمباکو نوش افراد کے مقابلے میں دو سے چار گنا زیادہ پایا جاتا ہے۔

ماہرین کا کہنا ہے کہ سگریٹ کے دھوئیں میں موجود سرطان پیدا کرنے والے کیمیائی مادے گردوں کے ذریعے فلٹر ہو کر پیشاب میں شامل ہو جاتے ہیں۔ یہ نقصان دہ مادے مثانے کی اندرونی سطح کے ساتھ مسلسل رابطے میں رہتے ہیں، جس کے نتیجے میں خلیات میں ایسی تبدیلیاں پیدا ہو سکتی ہیں جو بعد ازاں کینسر کی شکل اختیار کر لیتی ہیں۔

ڈاکٹروں نے بتایا کہ پیشاب میں خون آنا مثانے کے کینسر کی ابتدائی اور اہم علامات میں شامل ہے۔ انہوں نے عوام پر زور دیا کہ تمباکو نوشی ترک کریں اور کسی بھی غیر معمولی علامت کی صورت میں فوری طور پر طبی معائنہ کرائیں تاکہ بیماری کی بروقت تشخیص اور علاج ممکن ہو سکے۔