پنجگور میں انٹیلی جنس بیسڈ آپریشن میں 6 دہشت گرد ہلاک

سکیورٹی فورسز نے بلوچستان کے سرحدی ضلع پنجگور میں ایک بڑی کامیابی حاصل کرتے ہوئے انٹیلی جنس بیسڈ آپریشن (آئی بی او)کے دوران مبینہ طور پر بھارتی پراکسی کے طور پر کام کرنے والی تنظیم ‘فتن الہندوستان’ کے 6 مفرور دہشت گردوں کو ہلاک اور ان کے متعدد خفیہ ٹھکانوں کو مکمل طور پر تباہ کر دیا ہے۔ پاک فوج کے شعبہ تعلقات عامہ (آئی ایس پی آر) کی جانب سے جاری کردہ باقاعدہ اعلامیے کے مطابق سکیورٹی فورسز نے 3 اور 4 جون کی درمیانی شب پنجگور کے مخصوص علاقے میں بھارتی اسپانسرڈ دہشت گردوں کی موجودگی کی پختہ اور خفیہ اطلاعات پر اس حساس آپریشن کا آغاز کیا تھا۔آئی ایس پی آر کا کہنا ہے کہ آپریشن کے دوران سکیورٹی فورسز نے انتہائی پیشہ ورانہ مہارت کا مظاہرہ کرتے ہوئے دہشت گردوں کے متعدد ٹھکانوں کو مثر اور نشانہ باز انداز میں مسمار کیا۔ فورسز کے گھیرا میں آنے کے بعد مسلح مرتدین نے شدید فائرنگ کی، تاہم فورسز کی بھرپور جوابی کارروائی میں فتن الہندوستان سے تعلق رکھنے والے 6 سرغنہ موقع پر ہی ہلاک ہو گئے۔ ترجمان پاک فوج کے مطابق علاقے میں کسی بھی دوسرے ممکنہ بھارتی نیٹ ورک یا روپوش دہشت گرد کے مکمل خاتمے کو یقینی بنانے کے لیے بڑے پیمانے پر کلیئرنس آپریشن بدستور جاری ہے۔ آئی ایس پی آر نے قومی عزم کا اعادہ کرتے ہوئے واضح کیا کہ ملک بھر میں ‘عزمِ استحکام’ کے تحت ارضِ وطن سے دہشت گردی اور غیر ملکی پراکسیز کے جڑ سے خاتمے کے لیے سکیورٹی فورسز کی بلا تعطل اور ٹارگیٹڈ کارروائیاں پوری قوت کے ساتھ جاری رہیں گی۔