کوئٹہ، المناک واقعہ پر دل رنجیدہ ہے، میر عبید گورگیج

کوئٹہ: رکن بلوچستان اسمبلی حلقہ پی بی 44 اور پاکستان پیپلز پارٹی کے رہنما میر عبید گورگیج نے چمن پھاٹک کوئٹہ کے مقام پر مسافر ٹرین کو دہشتگردی کا نشانہ بنانے کے المناک واقعہ پر شدید ردعمل کا اظہار کرتے ہوئے معصوم مسافروں، خواتین اور بچوں کی شہادت پر دلی رنج و غم کا اظہار کیا ہے۔ اپنے ایک بیان میں میر عبید گورگیج نے کہا کہ نہتے اور بے گناہ شہریوں کو نشانہ بنانا انتہائی بزدلانہ اور انسانیت سوز عمل ہے، جس کی جتنی بھی مذمت کی جائے کم ہے۔ دہشتگرد عناصر بلوچستان کے پرامن ماحول کو خراب کرنے اور عوام میں خوف و ہراس پھیلانے کی ناکام کوشش کررہے ہیں، مگر عوام اور ریاست ملکر ان مذموم عزائم کو ناکام بنائیں گے۔ انہوں نے کہا کہ معصوم خواتین، بچوں اور عام شہریوں کو نشانہ بنانا اس بات کا ثبوت ہے کہ دہشتگردوں کا کسی مذہب، انسانیت اور بلوچ روایات سے کوئی تعلق نہیں۔ ایسے واقعات پوری قوم کیلئے باعث افسوس ہیں اور ان میں ملوث عناصر کسی رعایت کے مستحق نہیں۔ میر عبید گورگیج نے شہداء کے لواحقین سے دلی ہمدردی اور تعزیت کا اظہار کرتے ہوئے دعا کی کہ اللہ تعالیٰ شہداء کو جنت الفردوس میں اعلیٰ مقام عطا فرمائے اور زخمیوں کو جلد مکمل صحتیابی نصیب فرمائے۔ انہوں نے وفاقی اور صوبائی حکومت سے مطالبہ کیا کہ واقعہ میں ملوث دہشتگردوں اور ان کے سہولت کاروں کو فوری طور پر گرفتار کرکے قانون کے کٹہرے میں لایا جائے تاکہ عوام میں پائی جانے والی بے چینی کا خاتمہ ہوسکے۔ انہوں نے کہا کہ بلوچستان کے عوام امن، ترقی اور استحکام چاہتے ہیں اور دہشتگردی کے خلاف پوری قوم متحد ہے۔ ایسے افسوسناک واقعات عوام کے حوصلے پست نہیں کرسکتے بلکہ دہشتگردی کے خلاف قومی اتحاد کو مزید مضبوط کریں گے۔