کوئٹہ: اینٹی کرپشن کی بڑی کارروائی، کرپشن نیٹ ورک بے نقاب، سول ڈیفنس کیشیر اور اے جی آفس افسر گرفتار، ایف آئی آر درج

اینٹی کرپشن اسٹیبلشمنٹ کوئٹہ نے بدعنوانی کے خلاف ایک اہم اور فیصلہ کن کارروائی کرتے ہوئے سول ڈیفنس کے کیشیر محمد کامران اور اے جی آفس کے اسسٹنٹ اکاؤنٹس افسر عالم زیب زرکون کو گرفتار کر لیا ہے، جبکہ ان کے خلاف باقاعدہ ایف آئی آر بھی درج کر دی گئی ہے تحقیقات کے دوران انکشاف ہوا ہے کہ مذکورہ ملزمان نے اختیارات کا ناجائز استعمال کرتے ہوئے اپنے قریبی رشتہ داروں اور دیگر صوبوں سے تعلق رکھنے والے افراد کو غیر قانونی طور پر سرکاری ملازمتوں میں تعینات کیا مزید برآں، ایک سال بعد ریکارڈ میں رد و بدل کرتے ہوئے ان افراد کی تنخواہوں کو جعلی منٹس کے ذریعے قانونی شکل دینے کی کوشش کی گئی، جو کہ سنگین بدعنوانی اور سرکاری خزانے کو نقصان پہنچانے کے مترادف ہے اس کیس میں سابقہ ڈائریکٹر سول ڈیفنس سمیت نو دیگر ملزمان کی گرفتاری کے لیے بھی چھاپے مارے جا رہے ہیں، جبکہ اینٹی کرپشن حکام کا کہنا ہے کہ کسی بھی بااثر شخصیت کو قانون سے بالاتر نہیں سمجھا جائے گا اینٹی کرپشن اسٹیبلشمنٹ نے واضح کیا ہے کہ یہ کارروائیاں بلا امتیاز جاری رہیں گی اور بدعنوان عناصر کے خلاف آہنی ہاتھوں سے نمٹا جائے گا مزید گرفتاریاں متوقع ہیں اور تحقیقات کا دائرہ وسیع کیا جا رہا ہے تاکہ اس کرپشن نیٹ ورک کی مکمل جڑ تک پہنچا جا سکے