پاکستان اسٹاک ایکسچینج میں بڑی مندی کے ساتھ کاروبار کا آغاز

کراچی: پاکستان اسٹاک ایکسچینج میں کاروباری ہفتے کے پہلے روز مندی کے رجحان کے ساتھ کاروبار کا آغاز ہوا۔

مارکیٹ کھلتے ہی کے ایس ای 100 انڈیکس میں 4,795 پوائنٹس کی نمایاں کمی ریکارڈ کی گئی، جس کے بعد انڈیکس گر کر ایک لاکھ 62 ہزار 396 پوائنٹس کی سطح پر آگیا۔

بعد ازاں مندی کا دباؤ مزید بڑھ گیا اور انڈیکس میں بتدریج 4,943 اور پھر 5,433 پوائنٹس تک کمی دیکھی گئی، جس کے نتیجے میں مارکیٹ مزید گر کر ایک لاکھ 61 ہزار 757 پوائنٹس تک پہنچ گئی۔

واضح رہے کہ گزشتہ ہفتے کے اختتام پر پاکستان اسٹاک ایکسچینج میں مثبت رجحان دیکھنے میں آیا تھا، جب انڈیکس نے 166 ہزار اور 167 ہزار پوائنٹس کی دو اہم سطحیں عبور کی تھیں، جس سے سرمایہ کاروں کے اعتماد میں اضافہ ہوا تھا۔

اس سے قبل عالمی سطح پر امریکا ایران جنگ بندی مذاکرات سے متعلق مثبت توقعات، خطے میں کشیدگی میں کمی اور خام تیل کی قیمتوں میں استحکام کے باعث ایشیائی مارکیٹوں کے ساتھ ساتھ پاکستان اسٹاک مارکیٹ میں بھی تیزی کا رجحان رہا تھا۔

پاکستان اسٹاک ایکسچینج میں بڑی مندی کے ساتھ کاروبار کا آغاز