اسلام آباد میں فول پروف سیکیورٹی: بڑے پیمانے پر سرچ آپریشنز، مشکوک افراد گرفتار

ترجمان اسلام آباد پولیس کے مطابق وفاقی دارالحکومت میں سیکیورٹی کو یقینی بنانے کے لیے سخت اقدامات جاری ہیں اور شہر بھر میں فول پروف انتظامات کیے گئے ہیں۔

آئی جی اسلام آباد کے احکامات پر مختلف علاقوں میں بڑے پیمانے پر گرینڈ کومبنگ سرچ آپریشنز کیے گئے۔ ان آپریشنز کے دوران اسلام آباد کے تھانہ سیکریٹریٹ، تھانہ بھارہ کہو، تھانہ کھنہ، تھانہ شمس کالونی اور تھانہ سمبل کے علاقوں کو خصوصی طور پر چیک کیا گیا۔

سرچ آپریشنز زونل ایس پیز کی نگرانی میں کیے گئے، جن میں لیڈیز پولیس نے بھی حصہ لیا۔ کارروائی کے دوران 901 افراد اور 323 گھرانوں کی چیکنگ کی گئی جبکہ 74 دکانوں اور 26 ہوٹلوں کا معائنہ بھی کیا گیا۔

اسی طرح 180 موٹر سائیکلوں اور 73 گاڑیوں کی جانچ پڑتال کی گئی۔ آپریشن کے دوران 26 مشکوک افراد اور 13 موٹر سائیکلوں کو مزید تفتیش کے لیے متعلقہ تھانوں میں منتقل کیا گیا۔

پولیس نے منشیات فروشی میں ملوث ایک ملزم کو گرفتار کرکے اس کے قبضے سے 285 گرام آئس بھی برآمد کی۔

مزید برآں، شہر کے داخلی و خارجی راستوں پر سکیورٹی سخت کرنے کے لیے خصوصی چیکنگ پوائنٹس قائم کیے گئے ہیں جبکہ تمام پیٹرولنگ یونٹس اور خصوصی اسکواڈ مسلسل گشت کر رہے ہیں۔

مزید پڑھیں: اسلام آباد پولیس ڈولفن فورس کی کارروائیاں، 3 ماہ میں سینکڑوں ملزمان گرفتار

سینیئر افسران خود فیلڈ میں موجود رہ کر سیکیورٹی انتظامات کا جائزہ لے رہے ہیں۔ پولیس نے شہریوں سے اپیل کی ہے کہ وہ چیکنگ کے دوران تعاون کریں اور کسی بھی مشکوک سرگرمی کی فوری اطلاع دیں۔

اسلام آباد پولیس کے مطابق شہریوں کے جان و مال کے تحفظ کے لیے ہر ممکن اقدامات کیے جا رہے ہیں۔