ایران میں فوجی بھیجنے کی ضرورت نہیں، جنگ مہینوں نہیں بلکہ ہفتوں میں ختم ہوگی، مارکو روبیو

واشنگٹن: امریکی وزیر خارجہ مارکو روبیو نے ایران میں امریکی فوجی تعیناتی کے تاثر کو مسترد کرتے ہوئے کہا ہے کہ جنگ مہینوں نہیں بلکہ چند ہفتوں میں ختم ہو جائے گی۔

جی7 اجلاس کے بعد میڈیا سے گفتگو کرتے ہوئے روبیو نے بتایا کہ امریکا اپنے مقاصد زمینی فوج کے بغیر حاصل کر سکتا ہے، تاہم چند فوجی دستے خطے میں تعینات کیے جا رہے ہیں تاکہ صدر کو حالات کے مطابق فیصلے کرنے کا اختیار حاصل ہو۔

رپورٹس کے مطابق واشنگٹن نے ہزاروں میرینز کے دو دستے خطے میں بھیجے ہیں، جن میں سے پہلا مارچ کے آخر تک بڑے ایمفیبیئس اسالٹ جہاز کے ذریعے پہنچے گا، اور پینٹاگون کی جانب سے ایلیٹ ایئر بورن فوجیوں کی بھی تعیناتی متوقع ہے۔ اس سے خدشہ ہے کہ ایک محدود فضائی کارروائی طویل زمینی جنگ میں تبدیل ہو سکتی ہے۔

مارکو روبیو نے کہا کہ امریکا ایران کی 15 نکاتی تجویز کے باضابطہ جواب کا منتظر ہے، جبکہ ایران کا مؤقف ہے کہ اس نے یہ تجویز مسترد کر دی ہے، تاہم وہ ثالثوں کے ذریعے پیغامات کے تبادلے کے لیے رابطے برقرار رکھے ہوئے ہیں۔

رپورٹس میں بتایا گیا کہ امریکی مطالبات میں ایران کے جوہری اور میزائل پروگرام کے خاتمے اور توانائی کے عالمی تجارتی راستے پر کنٹرول شامل ہیں۔