’ایک بچے کے جانے سے ساری زندگی بدل گئی‘: پاکستان میں 2025 ایک دہائی کا سب سے خونی سال

پاکستان کی سپریم کورٹ کے باہر قانونی سرگرمیاں روزمرہ کی طرح جاری ہیں۔ وکلا اور ان کے کلائینٹس سیکیورٹی رکاوٹوں کے پاس سے تیزی سے گزرتے ہیں، کلرک فائلیں اٹھائے پھرتے ہیں اور کیفیٹریا کے ویٹرز گاہکوں کے انتظار میں کھڑے ہیں۔ لیکن ایڈووکیٹ اسلم گھمن کے لیے زندگی یہاں رک گئی ہے۔

وہ اپنے موبائل فون پر تصویریں دیکھتے ہیں۔ یہ ان کے بیٹے زبیر گھمن کی تصاویر ہیں۔ زبیر 12 سال سے اسلام آباد میں وکالت کر رہے تھے اور حال ہی میں انھیں سپریم کورٹ میں پریکٹس کا اجازت نامہ بھی مل گیا تھا۔ لیکن چند ہفتے پہلے، 11 نومبر کو، وہ اسلام آباد کے جوڈیشل کمپلیکس میں ایک خودکش حملے میں مارے گئے۔

’سب کچھ بدل گیا ہے۔ ایسا لگتا ہے ایک بچے کے جانے سے سب کچھ بدل گیا ہے۔‘ اسلم گھمن یہ کہتے ہوئے رو پڑے۔

اس سال پاکستان بھر میں ہزاروں خاندانوں کی طرح گھمن خاندان بھی ایک ایسی جنگ کی لپیٹ میں آ گیا جس کا وہ حصہ نہیں تھا۔ شدت پسندوں کے حملوں میں اضافے نے 2025 کو گزشتہ ایک دہائی کا سب سے خونی سال بنا دیا ہے۔