عوامی مینڈیٹ پر ڈاکہ جمہوری اقدار کے منافی ہے، مولانا عبدالرحمن رفیق

کوئٹہ ()
جمعیت علماء اسلام ضلع کوئٹہ کے امیر شیخ الحدیث مولانا عبدالرحمن رفیق، سیکرٹری جنرل حاجی عین اللہ شمس، سینیئر نائب امیر مولانا خورشید احمد، حاجی بشیر احمد کاکڑ، مولانا محب اللہ، مولانا محمد ایوب، شیخ مولانا عبدالاحد، مولانا سعید احمد، حافظ سراج الدین، مفتی محمد روزی خان بادیزئی، مولانا محمد شعیب جدون، رحیم الدین ایڈووکیٹ اور مولانا محمد عارف شمشیر نے کہا ہے کہ انتخابی عمل میں جماعت کے ساتھ ہونے والی دھاندلی اور زیادتیوں کے حوالے سے جن حقائق کا اعتراف مختلف حکومتی و سیاسی حلقوں کی جانب سے کیا جا رہا ہے وہ جمعیت علماء اسلام کے مؤقف پر مہرِ تصدیق ثبت کرتے ہیں۔ عوامی مینڈیٹ پر بزورِ طاقت ڈاکہ ڈالنا اور سیاسی انجینئرنگ کے ذریعے جمعیت علماء اسلام کا راستہ روکنے کی کوششیں جمہوری اقدار کے سراسر منافی ہیں۔انہوں نے کہا کہ ملک میں بارہا ایسے طرزِ عمل کو فروغ دیا گیا جس کے ذریعے عوام کی حقیقی نمائندگی کو کمزور کرنے اور دینی و عوامی قیادت کو اقتدار و فیصلہ سازی کے عمل سے دور رکھنے کی کوشش کی جاتی رہی جمعیت علماء اسلام کا جرم صرف یہ ہے کہ اس نے ہمیشہ آئین قانون اور جمہوری روایات کے دائرے میں رہتے ہوئے پُرامن اور اصولی سیاسی جدوجہد کا راستہ اختیار کیا۔ انہوں نے کہاکہ عوامی رائے اور مینڈیٹ میں مداخلت ملکی جمہوری تاریخ کا ایک سیاہ باب ہے گلگت بلتستان کے حالیہ انتخابی نتائج اور ان کے حوالے سے سامنے آنے والی صورتحال نے بھی جمعیت علماء اسلام کے دیرینہ مؤقف کو مزید تقویت فراہم کی ہے جے یو آئی نے ہمیشہ آئین کی بالادستی پارلیمان کی مضبوطی اور جمہوری اقدار کے فروغ کے لیے مثبت کردار ادا کیا ہے اور آئندہ بھی جمہوری روایات اور قومی مفادات کے تحفظ کے لیے اپنی جدوجہد جاری رکھے گی۔ انہوں نے کہا کہ علماء اور دینی قیادت کو اقتدار اور قومی فیصلہ سازی سے دور رکھنے کی پالیسی نہ صرف غیر جمہوری ہے بلکہ قومی مفادات اور عوامی امنگوں کے بھی منافی ہے۔

Browse Posts

نوجوانوں کی بے روزگاری ایک بڑا قومی مسئلہ بن چکی ہے، جمال رئیسانی

نوجوانوں کو جدید فنی تعلیم اور ہنر سکھایا جا رہا ہے، کوہیار ڈومکی

سکھر بیراج سندھ کی معیشت کی بنیاد ہے، مراد علی شاہ