پیٹرولیم لیوی کا خاتمہ، حکومت اور جماعت اسلامی کے درمیان مذاکرات کا فائنل راؤنڈ آج ہوگا

لاہور: پیٹرولیم لیوی کے خاتمے اور عوام کو ریلیف فراہم کرنے کے معاملے پر وفاقی حکومت اور جماعت اسلامی کی ذیلی کمیٹی کے درمیان مذاکرات کا آخری دور آج ہوگا۔

نائب امیر جماعت اسلامی لیاقت بلوچ کے مطابق اجلاس نائب وزیراعظم اسحاق ڈار کی میزبانی میں وزارت خارجہ کے کمیٹی روم میں منعقد ہوگا۔ انہوں نے مطالبہ کیا کہ حکومت پیٹرولیم لیوی کے خاتمے اور عوام کو ریلیف دینے کے لیے عملی اقدامات کرے۔

لیاقت بلوچ کا کہنا تھا کہ مہنگا تیل، بجلی اور گیس کے بھاری بلوں سمیت ٹیکسوں کا بوجھ عوام کے لیے ناقابل برداشت ہوچکا ہے، جبکہ سرکاری محکموں میں کرپشن قومی معیشت کے لیے بڑا مسئلہ بن چکی ہے۔

انہوں نے کہا کہ پیٹرولیم لیوی کا خاتمہ اور گیس کی درآمد سے جڑے مافیا کا خاتمہ معیشت کو بہتر بنانے میں مددگار ثابت ہوگا۔ جماعت اسلامی کی عوام کو ریلیف دلانے کی جدوجہد کامیاب ہوگی۔