محمود کوٹ پولیس کی چوکی عیسن والا میں کھلی کچہری، شہریوں کے مسائل سنے گئے

مظفرگڑھ (رانا رضوان احمد ) ڈی پی او منصور قمر کی قیادت اور ڈی ایس پی سرکل سنانواں ملک اکبر کی زیر نگرانی ایس ایچ او تھانہ محمود کوٹ عرفان فیض نے آج چوکی عیسن والا میں کھلی کچہری کا انعقاد کیا۔

کھلی کچہری میں شہریوں اور سائلین کا خیرمقدم کیا گیا اور ان کے مسائل و شکایات تفصیل سے سنے گئے، جن کے فوری حل کے لیے موقع پر اقدامات کیے گئے۔ اس موقع پر راستہ بندش کے حوالے سے جاری تنازع کو ایس ایچ او عرفان فیض نے دونوں فریقین کے درمیان صلح صفائی کروا کر خوش اسلوبی سے حل کروا دیا اور فوری طور پر راستہ بھی کھلوا دیا۔

ایس ایچ او عرفان فیض نے گفتگو کرتے ہوئے کہا کہ میرے دروازے عوام کے لیے 24 گھنٹے کھلے ہیں۔ شہری کسی بھی وقت اپنے مسائل اور شکایات کے سلسلے میں بلا جھجک رابطہ کر سکتے ہیں۔ پولیس عوام کی خدمت اور ان کے مسائل کے حل کے لیے ہمہ وقت کوشاں ہے۔

انہوں نے شہریوں کو معاشرے میں اخوت، بھائی چارے، امن و امان اور مثبت کردار ادا کرنے کی تلقین بھی کی۔ کھلی کچہری میں شریک سائلین نے ایس ایچ او عرفان فیض کی جانب سے کھلی کچہری کے انعقاد اور مسائل کے فوری حل کے اقدام کو سراہا۔

آخر میں ملکی سلامتی، استحکام، امن و خوشحالی کے لیے خصوصی دعا بھی کروائی گئی۔