ڈپٹی کمشنر حب جمعہ داد خان مندوخیل کا ڈسٹرکٹ جیل حب گڈانی کا دورہ

حب(نمائندہ خصوصی)ڈپٹی کمشنر حب جمعہ داد خان مندوخیل نے ڈسٹرکٹ جیل حب کا تفصیلی دورہ کیا اس موقع پر سپرنٹنڈنٹ ڈسٹرکٹ سینٹر جیل حب گڈانی بھی ان کے ہمراہ تھے دورے کے دوران ڈپٹی کمشنر نے جیل کے مختلف وارڈز، بیرکس اور دیگر حصوں کا تفصیلی معائنہ کیا اور قیدیوں کو فراہم کی جانے والی بنیادی سہولیات کا جائزہ لیا ڈپٹی کمشنر نے مختلف وارڈز میں قید افراد سے براہِ راست ملاقات کی اور ان کے مسائل شکایات اور ضروریات کے بارے میں دریافت کیا انہوں نے قیدیوں سے خوراک، پینے کے صاف پانی، صفائی ستھرائی، طبی سہولیات اور جیل انتظامیہ کے طرزِ عمل سے متعلق بھی استفسار کیا اس موقع پر قیدیوں نے ڈپٹی کمشنر کو اپنے مسائل سے آگاہ کیا جنہیں انہوں نے توجہ سے سنا اور متعلقہ جیل حکام کو جائز شکایات کے ازالے کے لیے ضروری اقدامات کرنے کی ہدایت کی ڈپٹی کمشنر نے جیل میں صفائی ستھرائی، رہائشی انتظامات، نظم و ضبط اور مجموعی ماحول کا بھی جائزہ لیا۔ انہوں نے ہدایت کی کہ قیدیوں کو قانون کے مطابق تمام بنیادی سہولیات فراہم کی جائیں اور ان کے ساتھ انسانی ہمدردی، احترام اور عزت و وقار کا مظاہرہ کیا جائے ڈپٹی کمشنر حب نے اس بات پر زور دیا کہ قیدیوں کی صحت، فلاح و بہبود اور اصلاح پر خصوصی توجہ دی جائے تاکہ انہیں معاشرے کا ذمہ دار شہری بنانے کے لیے سازگار ماحول فراہم کیا جا سکے اس موقع پر سپرنٹنڈنٹ ڈسٹرکٹ جیل نے ڈپٹی کمشنر حب کو جیل کے انتظامی امور، قیدیوں کی صورتحال اور دستیاب سہولیات کے حوالے سے بریفنگ بھی دی۔