وزیرِخارجہ سے بحرینی ہم منصب کی ملاقات؛ تجارت و سرمایہ کاری بڑھانے پر اتفاق

اسلام آباد: نائب وزیراعظم اور وزیر خارجہ سینیٹر محمد اسحاق ڈار سے بحرین کے وزیر خارجہ ڈاکٹر عبداللطیف بن راشد الزیانی نے وزارت خارجہ میں ملاقات کی، جس میں پاکستان اور بحرین کے دوطرفہ تعلقات، تجارت، سرمایہ کاری اور معاشی تعاون سمیت باہمی دلچسپی کے امور پر تبادلہ خیال کیا گیا۔

ملاقات کے دوران دونوں رہنماؤں نے پاکستان اور بحرین کے درمیان اقتصادی روابط مزید مضبوط بنانے اور تجارت و سرمایہ کاری کے نئے مواقع پیدا کرنے پر اتفاق کیا۔ دونوں وزرائے خارجہ نے دوطرفہ تعلقات میں ہونے والی مثبت پیش رفت پر اطمینان کا اظہار کرتے ہوئے باہمی مفادات کے شعبوں میں تعاون بڑھانے کی خواہش ظاہر کی۔

گفتگو میں خطے کی بدلتی ہوئی صورتحال اور عالمی سطح پر ہونے والی اہم پیش رفت کا بھی جائزہ لیا گیا۔ دونوں رہنماؤں نے مشترکہ دلچسپی کے معاملات پر بین الاقوامی فورمز پر رابطے مزید مؤثر بنانے کی ضرورت پر زور دیا۔

اس موقع پر اسحاق ڈار اور بحرینی وزیر خارجہ نے اختلافات اور تنازعات کے حل کے لیے مذاکرات اور سفارت کاری کو مؤثر راستہ قرار دیتے ہوئے اس حوالے سے تعاون جاری رکھنے پر اتفاق کیا۔