افغان طالبان رجیم کی پاکستان میں حملے کی کوشش، پاک فوج نے تمام ڈرونز گرا دیے

اسلام آباد: سیکیورٹی ذرائع کے مطابق افغانستان سے 8 ڈرونز پاکستانی فضائی حدود میں داخل ہوئے، جنہیں پاکستان کے فعال ایئر ڈیفنس سسٹم نے بروقت کارروائی کرتے ہوئے مار گرایا۔

ذرائع کے مطابق 4 ڈرونز طورخم بارڈر سے ملحقہ علاقوں جبکہ دیگر 4 کوہاٹ کے قریب گرائے گئے۔ سیکیورٹی ذرائع کا کہنا ہے کہ ڈرونز کو پاکستانی فضائی حدود میں داخل ہوتے ہی دفاعی نظام نے شناخت کرلیا اور انہیں نشانہ بنا کر گرا دیا گیا۔

سیکیورٹی ذرائع کے مطابق ڈرونز کے ذریعے عوامی مقامات کو نشانہ بنانے کی مبینہ کوشش ناکام بنا دی گئی، جبکہ گرائے گئے ڈرونز کا ملبہ بھی تحویل میں لیا جا رہا ہے۔

ذرائع کا کہنا ہے کہ پاک افغان سرحد پر فضائی نگرانی اور دفاعی نظام مسلسل فعال ہے اور کسی بھی ممکنہ فضائی خطرے سے نمٹنے کے لیے سیکیورٹی فورسز چوکس ہیں۔

یہ پیش رفت ایسے وقت میں سامنے آئی ہے جب کرم سیکٹر میں افغانستان سے مبینہ دراندازی کی کوشش اور پاکستانی سرحدی چوکیوں پر فائرنگ کی اطلاعات بھی سامنے آئی ہیں۔ پاکستانی سیکیورٹی ذرائع کے مطابق فورسز نے دراندازی کی کوشش ناکام بناتے ہوئے جوابی کارروائی کی۔

تاہم افغان طالبان کی جانب سے ان دعوؤں پر اس رپورٹ میں کوئی الگ مؤقف سامنے نہیں آیا۔